SPAOH, 22 Julai: Pengawa ngatur Pesta Buntal Bagi Menua Betong 2024 endang siti chara dikena perintah terus ngangkatka ikan buntal nyadi siti agi produk dagang temuai ba Saribas.
Kaban Kunsil Nengeri (ADUN) Saribas Datuk Mohd Razi Sitam madah, peminta ke tinggi nyengkaum ari Semenanjung ngagai ikan nya ngujungka nama Kampung Manggut diatu majak dikelala nyadi pengeluar ikan buntal ke nyamai sereta tusah digiga ba endur bukai di Sarawak.
“Kitai deka terus ngatur program baka sehari tu Pesta Ikan Buntal laban nya siti chara kitai ngangkatka produk ikan buntal ba renggat lokal enggau mega ba renggat nengeri,” ku iya.
Iya mansutka jaku nya pengudah nangguhka Pesta Buntal Bagi Menua Betong 2024 di Diwan Sri Saribas Kampung Manggut, ditu kemari.
Nya alai, ku iya kerejasama semua raban lebih agi komuniti ke diau besemak beguna ngambika ikan buntal di Kampung Manggut meruan bisi.
Nangkan ke nya, Razi madah peminta ngasuh Pesta Buntal nyadi produk dagang temuai ba sitak nya deka dianjung nuju Opis Menteri Dagang Temuai, Industri Kreatif enggau Seni Pemerindang Sarawak udah tu.
“Kitai minta ngagai Opis Menteri Dagang Temuai ngambika ngaga Pesta Ikan Buntal tu nyadi produk dagang temuai sekalika nya diatur ninting taun tauka dua taun sekali.
“Kitai ngelempai ngagai Opis Menteri Dagang Temuai mantu ari segi belanja lalu naka tu Puji Tuhan kerejasama ari YB Sapit Premier Sarawak Datuk Amar Douglas enggau Kaban Parlimen Betong Dr Richard Rapu begulai enggau aku kami besukung ari segi belanja dikena ngemujurka program tu,” ku iya.-TVS
