SARATOK, 20 Julai: Pengawa ngatur Program Pemansang Modal Mensia (PMI) pantar pemadu manah dikena nempa pedagang tani ari komuniti menua pesisir.
Kaban Kunsil Nengeri (ADUN) Krian Friday Belik madah, raban sida deka terus meri sukung sereta bantu ke diguna ari Opis Betanam Betupi Saratok dikena ngemujurka pengawa nya.
“Program diaduka sehari tu tadi endang iya ngembuan tuju ti manah iya nya deka meri penemu ngagai kitai ba menua pesisir lebih agi ari rumah panjai.
“Penemu tu deka mantu ngemajuka pengidup pengidup kita empu nengah chara ke baru.
“Pengawa ngasilka pemakai baka kerupuk enggau ke bukai ke bisi kualiti tejamin ari segi pemeresi kelimpah dikereja penuh,” ku iya.
Iya madah munyi nya pengudah Nutup Program Pemansang Modal Mensia (PMI) diatur Opis Betanam Betupi Saratok ba Rumah Panjai Spancer Gon Engkabang Rias Jaya Mapar ditu, ensana.
Friday mega madah, nengah program baka nya peranak menua pesisir ke bisi ngambi bagi tentu ulih nambahka penatai pemisi diri.
Inisiatif nya ku iya senutuk enggau juluk Perintah Sarawak ke deka genap rayat nengeri tu ngembuan penatai pemisi ke tinggi manggai taun 2030.
Ngelansa pasal program nya, bisi 30 iku penyereta mungkur pengani rumah panjai ba sitak Krian Tengah bisi nyereta Kus Ngaga Ikan Injin enggau Nuget Ikan Tilapia bepalan ba Rumah Panjai Spancer Gon Engkabang Rias Jaya Mapar Kaki Wong.
Kus nya endang Program Pemansang Modal Mensia (PMI) diatur Opis Betanam Betupi Sarawak dibaruh Projek Pemansang Pedagang Industri Pengawa Tani.-TVS
