KUCHING, 19 Julai: Raban penguna Sarawak Energy Berhad (SEB) di wilayah tu deka bulih pemaik nengah pengawa masang teknologi meter pintar ke baru dikena matau enggau ngatur pengawa nguna karan.
SEB nengah siti penerang sehari tu madahka, meter pintar nya ulih nganjung bacha sechara elektronik enggau nadai agi begunaka bacha sechara manual baka ngelama tu.
“Pengawa nguna meter baru tu mega deka ngemudahka bacha bil ke betul, nyidi enggau mulaika pemanah enggau lebih jampat enti bisi penanggul sereta matau kualiti kuasa ke ditambahka,”ku penerang nya.
Nitihka penerang nya, sebarang bil ti bedau di bayar ke dikeluarka ngagai penguna iya nya bepelasarka penyelai ti disidi ba meter maya nganti nya.
“Pekara nya deka diatur nitihka prosedur operasyen standard enggau deka dipadahka ngagai pelanggan ungkup rikod sida,” ku tandu penerang nya.
Udah nya, SEB nengah pampang operasyen enggau runchit iya, Serikat SESCO Berhad (SESCO) bisi nyendiaka pengawa masang meter pintar ungkup ngantika meter lama sechara pechuma enggau nadai agi kos tambah ungkup penguna ke bisi diatu.
“SESCO nyaran deka masang 180,000 meter pintar di Kuching manggai 2026, enggau tambah 200,000 meter pintar di Sibu, Miri enggau Bintulu manggai 2029 nyadi sebagi ari penyungkak dikena nambahka penyulut servis penguna.
“Naka ke diatu, lebih 80,000 meter pintar udah dipasang di selampur Sarawak tebal agi ba indu mengeri besai,” ku SEB.
Ku terang SEB mega, penguna diperansang ngatur danji betemu ungkup nganti meter dikena nentuka sida ulih datai maya proses masang nya.
Nengah langkah rapat proaktif nya deka ngemudahka komunikasyen sechara terus, mutarka sebarang pengirau ati sereta nentuka pengelanchar ngalih ngagai sistem meter pintar.
Ungkup penerang silik tauka ngatur danji temu nganti meter, tau betelefon ba lumur palan nyaga penguna SEB di lumur 1300-88-3111, e-mel customercare@sarawakenergy.com tauka berandau sechara tali arus enggau ejen Carina.-TVS
