KABONG, 19 Julai: Bisi 18 Projek Transformasyen Menua Pesisir (RTP) 2024 ba sitak Kunsil Nengeri (DUN) Kabong beungkus RM3.81 juta udah dilempai ba baruh kemata Kaunsil Pelilih Saratok (MDS).
Pegawai Pengatur Khas Palan Servis ADUN Kabong Nur Elfie Amir madah, agih projek RTP ba sitak DUN Kabong dibagi bela lalu ukai semina ditengali siti endur aja.
“Empai lama kami udah ngabas taba 18 projek ke dipejalaika Kaunsil Pelilih Saratok.
“Sekeda ari projek nya baka Ngaga Baru Diwan Mayuh Guna Kampung Keranggas Baru Roban, pia mega Projek Ngemanah Jalai Rumah Chaong anak Tinggir, Ngemanah Jalai Nuju Jelatung Rumah Jemeni, Sungai Rumput enggau ke bukai.
“Pengawa magi projek RTP ungkup DUN Kabong udah diatur ADUN iya empu Mohd Chee Kadir,” ku iya seraya madah atur nya dibagi bela nadai ditengali siti endur aja.
Iya mansutka penemu nya pengudah tembu pejalai ngabas Taba Projek Transformasyen Menua Pesisir (RTP) 2024 DUN Kabong begulai enggau raban ari Kaunsil Pelilih Saratok, empai lama.
Ku terang iya, kebendar semua projek RTP ungkup DUN nya taun 2024 bisi 24 iti.
Ngelansa senentang pejalai ngabas projek nya, Nur madah pengani genturung pendiau meri terima kasih ngagai iring perintah nengeri laban udah ngemeratka pemansang ungkup rayat di menua pesisir nengah projek RTP.
Kelimpah MDS, ejensi bukai ke bela bisi nyereta pejalai ngabas prjek RTP iya nya pengari Opis Pelilih Kabong enggau Opis Pelilih Mit Roban.-TVS
