SARATOK, 19 Julai: Opis Betanam Betupi Bagi Menua Betong deka ngemayuhka agi program enggau kus pengelandik produk ili ti bepelasarka pengawa betanam betupi sechara ‘hands on’ ngagai komuniti menua pesisir ba pelilih nya.
Penulung Pegawai Pemansang Komuniti Opis Betanam Betupi Bagi Menua Betong, Monica Bermas Brauh madahka, pengawa ngatur program nya mega deka ditegapka, ti sebagi ari inisiatif opis nya deka nempa raban pedagang ungkup sektor nya jemah.
“Engka udah tu ila sida deka mekuh ngaul diri dalam dagang, engka sida madah sida ‘expective’ dalam bidang tu sereta sida deka ngaga ‘nugget’ ba rumah sechara mit, dijual ba sekila tauka ba makit Saratok dia, lalu ulih nyungkak penatai pemisi sida,” ku iya.
Monica ke mega pengatur program, madah munyi nya pengudah kus ti diatur Opis Betanam Betupi Saratok ba Rumah Panjai Spancer Gon Engkabang Rias Jaya Mapar Kaki Wong, kemari.
Nangkan ke nya, iya mega ngarapka peranak menua pesisir ba bagi menua Betong ulih nguna peluang nya dikena nambahka pengelandik sida, tebal agi pengelandik dalam bidang ngasilka produk ili ti bepelasarka pengawa betanam betupi.
Ku iya, aktiviti nya mega deka dipejalaika sepanjai taun sereta palan bukai ungkup bejalaika program nya udah tu ila, iya nya di pelilih Debak, Pusa enggau Betong.
Berebak enggau nya, raban raban penyereta ti bisi ngambi bagi dalam program nya meri terima kasih ngagai ADUN Krian, Friday Belik enggau Opis Betanam Betupi Pelilih Saratok laban udah ngatur program ke manah baka nya.
Ku Alice Katum program baka nya endang manah amat laban ulih meri mayuh pemaik ngagai sida lebih agi ke diau ba menua pesisir.
“Ari tu, kami bulih penemu ti ulih nambahka penemu senentang baka ni deka proses pemakai asil ari nupi ikan ai sungai.
“Udah tu ila, engka ulih diatur ngagai komuniti bukai mega, ngambika semua, tebal agi raban indu ulih bulih penguntung sereta mantu ekonomi ruang bilik nengah pengawa proses pemakai baka tu,” ku iya.
Udah nya, ba penemu Penghulu Josephine Entira Sagai pengawa ngatur program nya deka ngulihka komuniti menua pesisir ngembuan pengelandik dikena ngasilka produk sida empu.
“Ungkup peranak ba menua pesisir, program baka tu, ulih meri pemaik dikena mantu raban indai ngaga ikan injin kediri empu, ngaga ‘nugget’ kediri empu ari kitai meli ba makit, nya keterubah.
“Kedua, raban indai ba rumah panjai ulih nyual dikena nambahka ekonomi ruang bilik sida empu, sereta aku ngasai program ti diatur opis betanam betupi tu endang beguna amat, manah sereta enda ngelebu,” ku iya.-TVS
