SARATOK, 17 Julai: Tabung Ekonomi Gagasan Anak Sarawak (TEGAS) iya nya pantar ti pemadu manah dikena bedajaka bidang Pengelandik Teknikal Enggau Vokasional (TVET), Pelajar Sains, Teknologi, Injiniring Enggau Matematik (STEM) sereta bidang nyadi pedagang di Sarawak.
Menijar Kanan TEGAS, Fredick Kevin Buseli madahka, TEGAS seruran chakah deka nentuka juluk perintah Sarawak ti deka nyadi nengeri maju manggai taun 2030 nengah program ti meri empas ke manah ulih dijapai.
“Nyadi sebuah ejensi ti ukai bepelasarka untung tauka NGO, TEGAS nguji nyadi siti pantar ti pemadu manah di Sarawak dikena ngelakuka pelajar TVET, STEM enggau Dagang.
“Nya alai, TEGAS seruran chakah nentuka agenda Perintah Sarawak dikena nempa Sarawak nyadi wilayah ti pemadu maju ba taun 2030.
“Pekara tu dikemujur nengah sekeda program ti meri empas ke manah, ke diatur ngambika nadai komuniti tinggal ari arus pemansang pelajar sereta pengelandik, pia mega ekonomi sida sekalika ba mengeri tauka menua pesisir,”ku iya.
Fredick mansutka penemu nya rambau Program Reruai Project Of Dream Realized (PRO-DR) 2024 Renggat ke-9 diatur ba Diwan Sri Krian, kemari.
Udah nya, iya mega nerangka, TEGAS diatu udah merambu enggau bejalaika mayuh macham inisiatif dikena nentuka tetiap iku nembiak sekula tauka raban nembiak di Sarawak terus bulih peluang ke sama dalam bidang akademik tauka pengelandik nyentuk ke diatu.
Tandu iya, program bejalai Pro-DR mega manah alai nyendiaka peluang ngagai nembiak sekula menua pesisir ngulihka penerang ti pemadu baru bekaul pelajar, latih sereta chara minta turu pelajar.-TVS
