BETONG, 15 Julai: Perintah Sarawak udah mayar pampas tanah ngagai 117 iku penerima bekau ari tanah sida ti kena tujah projek ngangkatmanah tikas dua jalai ari Saka Betong ke Spaoh enggau Sekula Primari (SK) Paku Central Spaoh sepenyampau lebih RM2.5 juta.
Sapit Premier Sarawak, Datuk Amar Douglas Uggah Embas madahka, pampas nya ungkup pengempu pala tanah ti udah meri pemendar ngagai perintah bejalaika projek pemansang neresa tanah sida.
Ku uggah, perintah enda kala ngerampas tanah rayat ke bisi kaul dalam aktiviti pemansang tang pampas tetap diberi ngagai pengempu pala tanah nitihka atur undang-undang.
“Apin bisi pala pun enti iya Native Land endang deka dipampas.
“Tanah nya tetap deka dibayar, Perintah GPS enda ngerampas tanah sida (rayat).
“Enti kami (perintah) begunaka utai nya (tanah) nyadi seharitu mih ke tanda ke chuan ke teladan iyaka nampak (dibayar pampas ungkup projek nya).
“Nyadi semua utai nya endang neresa menua, neresa tanah ke endang bisi orang ngempu nyadi kitai perintah GPS endang meri pampas,”ku iya.
Iya mansutka jaku nya rambau Pengerami Nyerahka Chek Pampas Tanah bagi Projek Ngangkatmanah Jalai ari Saka di Betong ke Spaoh enggau SK Paku Central di Spaoh enggau Projek Jalai Ulu Paku ke Ulu Kota, sehari tu tadi.
Projek Ngangkatmanah Jalai ari Saka ke Spaoh udah dikemendarka dalam bulan Disember 2020 ti ngaul 74 Lot Tanah Hak Ngempu enggau 68 Lot Tanah Hak Adat Bumiputera Enggau Tanah Rizab Komunal Bumiputera enggau pemesai projek iya nya 15.11 hektar.
Nangka ke nya, bagi projek ngaga, ngangkatmanah enggau nembuka Jalai Ulu Paku-Ulu Kota lalu Jalai Ulu Paku udah dikemendar ba bulan June taun nyin tadi ti ngaul empat Lot Tanah Hak Ngempu enggau 18 Lot Tanah Hak Adat Bumiputera enggau pemesai tanah iya nya 16.65 hektar.-TVS
ENDS
