KAPIT, 15 Julai: Atur milih Malaysia Chairman Aum Besai ASEAN ba taun baru patut diguna manah dikena ngemanah agi program ninting taun baka Safari Rakih Baleh awakka program nya ulih matak mayuh penyereta ari menua luar.
Menteri Kereja Raya ke mega Kaban Parlimen Kapit, Dato Sri Alexander Nanta Linggi, laban ke nyadi Chairman ASEAN mayuh aum enggau jurai randau antarabansa deka diatur ba Sarawak enggau ba nengeri bukai.
Nya alai, pengawa ngemanah agi Program Safari Rakit Baleh tentu ulih matak pengerindu sida ke bisi ngambi bagi ba aum ngambika datai ke Kapit.
“Kitai deka nguna peluang ngambika kitai ulih matak sida ke bekaul ngulu aum datai ke Kapit maya pengerami rakit safari taun baru.
“Udah nya taun 2026 iya nya Taun Nemuai Ke Malaysia, nyadi tu chukup nemban.
“Tu kebendar achara ninting taun masuk 27 kali udah diatur kitai deka dikemanah ngambika ulih matak mayuh agi pengani diau besemak sereta meri pemaik ngagai sida,” ku iya.
Ku iya, genap perambu enggau atur ke digaga, pekara ke lebih beguna iya nya empas iya ngagai mensia mayuh laban achara ke richah tentu deka nyungkak ekonomi ke mayuh ngagai pedagang-pedagang lokal ba Kapit, empu.
Iya mansutka pekara nya ngagai media pengudah nyuaka perais ngagai bala pemenang Safari Rakit Baleh edisyen ke-27 diatur ba Tebing Sungai Kapit, kemari.
Tim PBB Sarawak dipadu ngempu gelar champion ba Kategori Buluh Tebuka Lelaki.
Udah tim Biro Indu Rumah Ukau dipadu ngempu gelar champion ba kateori rakit buluh tebuka.
Champion pekit nya mai pular perais enggau mata duit penyampau RM6,000.
Kelimpah ari pekit berakit, achara bukai ke bela bisi diatur iya nya pekit bot laju, lumba perau udah mujur matak beribut iku nemuai datai ke Kapit.-TVS