SPAOH, 14 Julai: Opis Betanam Betupi deka terus bebendar mantu nyungkak penatai pemisi enggau sosio ekonomi rayat di wilayah tu.
Sapit Premier Sarawak Datuk Amar Douglas Uggah Embas madah, tanggungpengawa nya seriris enggau juluk Premier Sarawak Datuk Patinggi Tan Sri Abang Johari Tun Openg ti deka meda rayat nengeri tu bepeluang nambahka penatai pemisi diri nengah pengawa betanam betupi.
“YAB (Premier Sarawak) madah iya nya Sarawak diatu diaku nyadi wilayah bepenatai pemisi tinggi.
“Diatu kitai (deka) nentuka iya nya rayat Sarawak mega bepeluang ngembuan penatai pemisi tinggi.
“Nya alai Opis Betanam Betupi bejalaika tanggungpengawa ke chukup beguna amat sekumbang 100 taun mayuh ubah,” ku iya.
Uggah ke mega ke mega Kaban Kunsil Nengeri (ADUN) Bukit Saban madah munyi nya nya maya dirandau media pengudah nangguhka Spaoh Agrofest 2024 di Pelaman Spaoh, sehari tu tadi.
Ku iya, raban orang betanam betupi patut pintar nguna teknologi miden baka ‘Internet Of Thing (IoT), hidroponik enggau fertigasyen ke ulih nyadi pengerandang ngagai aktiviti nya dudi hari.
“Suba kitai enda nemu pasal IoT.
“Kitai enda nemu pasal hidroponik , enda nemu pasal fertigasyen, pasal AI tang diatu, tu mih deka ngeransang pemansang ekonomi kitai ba Opis Betanam Betupi.
“Nyadi kitai berasai tepantup ati laban sida udah ulih neleba diri enggau mai ubah ngagai rayat,” ku tandu iya.
Uggah madah diri berasai tepantup ati meda rikod dijapai Opis Betanam Betupi kenyau 100 taun ke udah dalam nyungkak penatai pemisi rayat menua pesisir.
Pekara nya ku iya berupai dipeda lebuh mayuh rayat menua pesisir lebih agi ke diau ba rumah panjai diatu nguan rumah batu kelimpah bulih reta tengkira.-TVS
