SRI AMAN, 14 Julai: Perintah Sarawak deka pedagang lokal ngemeranka ekonomi digital ukai semina ba renggat menua tu aja tang mega patut rembus ngagai tikas dunya.
Kaban Kunsil Nengeri (ADUN) Bukit Begunan Datuk Mong Dagang madah ekonomi digital endang penatai ekonomi dudi hari lalu pengawa dagang ke dipejalaika nengah tali arus mega ngembuan rentayan ke besai.
Ku Mong, pengawa nguna ekonomi digital mega dikeandal ulih ngedut takah sosio-ekonomi antara peranak mengeri enggau menua pesisir di Sarawak.
“Diatu ba tikas ketiga, pugu strategik pemansang nengeri Sarawak iya nya Ekonomi Digital lalu Perintah Sarawak deka meda pedagang lebih agi anak Sarawak ulih ngemeranka pengawa tu nyentuk ke tikas dunya.
“Nya alai TEGAS udah diberi mandat ari Premier Sarawak dalam ngemansang enggau nyukung ekosistem pedagang pemungkal nengah TEGAS Digital Innovation Hub di Bentulu enggau Miri kelimpah TEGAS Digital Village di Kuching.
“Ekonomi Digital endang ekonomi dudi hari,” ku iya.
Iya madah munyi nya maya macha teks jaku Sapit Menteri Dagang Temuai, Industri Kreatif enggau Seni Pemerindang Sarawak Datuk Snowdan Lawan rambau Program Roadshow Project Of Dream Realised (PRO-DR) Tusun ke-19 di Dewan Masyarakat Sri Aman, sehari tu tadi.
Iya madah, nembiak rebak diatu patut neleba diri enggau pengelandik sereta batang pengawa sida enggau ubah kemaya hari empas ari ekonomi digital.
Pemansang dalam inovasyen digital diatu ku iya siti penemu ke ulih dipelajar enggau mudah nengah internet beduduk ari pemisi pelasar youtube.-TVS
