KOTA MELAKA, 14 Julai: Perais ungkup atlit Malaysia ke bulih midul emas ba Lumba Olimpik Paris 2024 dipelaba deka ditambah beduduk ari majak mayuh raban ke meri belanja.
Menteri Nembiak enggau Lumba Hannah Yeoh madah, pemeri perais nya kebendar dikena serikat peribit meri peransang sereta sukung ngagai atlit menua ke mujur niki podium ba pekit empat taun sekali nya.
“Ari perintah agi mengkang (RM1 juta) semina diatu raban peribit bisi udah berandau enggau komiti ‘Road To Gold’ ungkup atur meri perais ngagai atlit ke mujur mai pulai midul olimpik emas keterubah.
“Nyadi pekara nya deka dipadahka komiti Road To Gold enda lama agi,” ku iya.
Iya madah munyi nya pengudah bejadika Program Pengelandik Pemun (KLAS): Nyemerai Khas Parlimen Kota Melaka, kemari.
Perintah nyendiaka perais RM1juta ngagai atlit ke mujur bulih midul emas ba pekit ti ditaga diatur berengkah 26 Julai nyentuk 11 Ogos tu nengah Skim Perais Menang Lumba.
Nangkan ke nya, bela dipadahka atlit Malaysia ke mujur mai pulai midul ari Lumba Olimpik di Paris deka nerima perais sebuah kerita chap menua luar.-TVS