MIRI, 13 Julai: Perintah Sarawak ba baruh iring Gabungan Parti Sarawak (GPS) komited deka nentuka lebih 5,000 buah rumah panjai ba menua pesisir, genturung pendiau enggau palan pengentap pendiau bukai di serata nengeri disambung jalai manggai taun 2030.
Sapit Premier Sarawak , Datuk Amar Douglas Uggah Embas nyemetak madahka, dikena ngemujurka juluk nya, semua rayat pupu bansa enggau pengarap mesti terus beserakup sereta nyukung pemansang ti dibai perintah.
“Kita mesti nulak orang ti deka nanam pemenchi tauka deka ngelaban perintah.
“Enti kita ngemendarka sida tu mendam ba menua kita, sida tau ngeruga penyerakup enggau pemaik raban bansa, kaul ti rat komuniti sereta ngasuh rumah panjai bepechah,” ku iya.
Uggah ke mega Menteri Infrastruktur enggau Pemansang Penyangkai Kapal Sarawak mansutka jaku nya rambau bejadika Gerija Borneo Evangelical Missionary (BEM) ke beungkus RM850,000 di Saeh, Niah, Bekenu kemari.
Ngelansa pasal gerija baru nya, Uggah ti nyadi menteri ti megai tanggungpengawa ba Unit Pengarap Bukai (UNIFOR), meri jamin deka terus meri bantu enggau nyukung pemansang ngaul semua rumah sembiang ukai Islam di menua tu.
“Bala kita ulih ngelawa pengari rayat GPS ba kandang menua kita empu ti deka minta geran ari UNIFOR,” terang iya.
Berebak enggau nya, Uggah mega bisi meri geran penyampau RM72,000 ngagai Rumah Ayai Sawing.
Sama bisi datai Sapit Menteri Pemansang Indu, Ruang Bilik, enggau Pengelantang Komuniti Sarawak Datuk Hajah Rosey Yunus enggau Direktor UNIFOR Datuk Georgina Apphia Ngau.-TVS
