MIRI, 13 Julai: Siti jalai tebing tasik besambungka Kampung Bakam enggau Simpang Sepupok di Niah ditu deka diangkatmanah.
Sapit Premier Sarawak, Datuk Amar Douglas Uggah Embas madahka, diatu projek ti dipelanja perintah nengeri ke nguna kos penyampau RM160 juta nya benung ba renggat perambu.
“Tang, kami ngarapka projek tu ulih ditender dalam timpuh sebulan,” ku iya madah ngagai media pengudah bejadika Gerija Borneo Evangelical Missionary (BEM) ke beungkus RM850,000 di Saeh, Bekenu kemari.
Sapit Menteri Pemansang Indu, Ruang Bilik, enggau Pengelantang Komuniti Sarawak Datuk Rosey Yunus enggau Direktor UNIFOR Datuk Georgina Apphia Ngau sama bisi ngulu pengerami nya.
Uggah ke mega Menteri Infrastruktur enggau Pemansang Penyangkai Kapal nerangka, perintah besai bisi ngungkupka belanja penyampau RM60 juta dikena ngangkatmanah Jalai Rambai-Kampung Bulau di Bekenu.
“Projek tu diatu benung dalam proses dokumentasyen tender enggau kami ngarapka ulih ditender enggau naka pengelengkas,” ku iya.
Iya mega madahka, perintah nengeri udah ngemendarka projek ngaga jematan ti nguna kos penyampau RM10 juta di Kampung Balau di Bekenu.
“Nya alai, kitai ngarapka projek tu ulih ditender dalam bulan September taun tu,” ku terang iya.-TVS
