MIRI, 12 Julai: Sarawak udah ngungkupka agih belanja RM300,000 dikena meri latih ngagai doktor pakar tungkul ati ke bisi diatu nyadi pakar kardiologi dikena negapka pengelandik sida dalam napi enggau ngintu penyakit kronik nya di wilayah tu.
Ku Premier Sarawak Datuk Patinggi Tan Sri Abang Johari Tun Openg madah, raban keterubah deka ngaul tiga iku doktor pakar lalu raban ke bukai udah nya deka diberi latih ke sama.
“Nya kebuah kitai begunaka pakar kardiologi ti pakar ngubat penyakit tungkul ati enggau sistem kardiovaskular sereta untak,” ku iya bejaku maya rambau bejadika Blok Administrasyen Baru Sekula Sekondari Pei Min, Hari Empat.
Abang Johari madahka, mayuh penyakit strok ke nyadi puncha ngagai darah meku dalam untak ngaul raban nembiak, lalu iya udah ngulihka penemu ari Sapit Premier Sarawak ke mega Menteri Pengerai Mensia Mayuh, Pengawa Berumah enggau Perintah Lokal Sarawak, Datuk Amar Dr. Sim Kui Hian bekaul enggau pekara nya.
“Aku udah bejaku enggau Sepital Universiti baka ni deka mutarka penanggul tu, lalu iya madah kitai begunaka pakar ,” ku iya.
Sebedau tu, Perintah Sarawak agi nganti pemendar ari Opis Menteri Pengerai Malaysia (KKM) dikena ngangkatmanah Sepital Bintulu ungkup dijadika palan tungkul ati satelit dikena nyendiaka servis nya ngagai perayat di wilayah tengah Sarawak.-TVS
