MIRI, 12 Julai: Sarawak merambu deka nengkebang bidang perubat barat sereta tradisional ke dipeda ngembuan potensyel dikemansangka di wilayah tu.
Premier Sarawak, Datuk Patinggi Tan Sri Abang Johari Tun Openg madahka, pekara nya deka dikemanahka Sapit Premier Sarawak Datuk Amar Dr Sim Kui Hian ke deka ngagai China udah tu ila.
“Enti sida setuju, kitai engka bisi pampang Universiti Fudan dalam bidang sains perubat di Miri,” ku iya bejaku maya rambau bejadika Blok Administrasyen Baru Sekula Sekondari Pei Min, Hari Empat.
Tandu iya, Perintah Sarawak deka nyukung dalam ngemudahka fakulti nya ditumbuhka berindik ari Sarawak kaya enggau biodiversiti.
“Aku udah numbuhka Palan Penyakit Berampit Sarawak (SIDC) di Kuching enggau semua pakar datai ngaga pansik.
“Enggau nya kitai meda deka bisi vaksin enggau ubat-ubat ungkup penyakit baru dikena nyumanka penyakit-penyakit baru ke deka datai ila, ”ku iya.
Sebedau tu, sepuluh saintis ari Palan Penyakit Berampit Sarawak (SIDC) udah dipilih nyereta program ‘Enabling Industrial Transformation in Sarawak Through Research Infrastructure Harmonization Fellowships’ di Universiti Murdoch di Perth, Australia.
Chairman SIDC enggau Sapit Menteri Pelajar, Inovasyen enggau Pemansang Bakat Sarawak, Datuk Dr Annuar Rapaee madahka, program tu mandangka kerejasama rat entara Australia enggau Malaysia dalam negapka ekonomi bepelasarka penemu nengah diplomasi saintifik.-TVS
