KUCHING, 11 Julai: Pengawa ngatur pekit Lumba enggau Main Malaysia (SUKMA) ke-21 kena 17 ngagai 24 ogos tu di Sarawak ulih meri penguntung ngagai industri hospitaliti enggau pedagang mit, ku Datuk Seri Abdul Karim Rahman Hamzah.
Menteri Nembiak, Lumba enggau Dagang Temuai Sarawak nya madah, enda baka atur pengawa ke udah, SUKMA 2024 deka ngaul semilan bagi menua di sarawak iya nya Kuching, Samarahan, Serian, Sri Aman, Betong, Sibu, Mukah, Bintulu enggau Miri.
“Enti digaga di Kuching aja, semina orang di Kuching aja ke bulih penguntung, enti digaga dalam semilan bagi, bayangka berapa pemayuh orang ke bulih penguntung. Pengaga enggau pemuas ati mega deka diasai.
“Nya siti ari kebuah kami deka nyadi pengatur enggau pengawa ngambika tiap endur ke nyadi tuai rumah bulih penguntung, besai tauka mit, industri hospitaliti, hotel, pengangkut, pemakai, enggau ke bukai semua deka diberi upah,” ku iya.
Iya madah munyi nya ba sesi randau khas begulai enggau Ejensi Berita Nasional Malaysia (Bernama) di Palan Konvensyen Borneo Kuching (BCCK).
Berebak enggau nya, Abdul Karim madahka pengawa ngatur SUKMA mega ulih nambahka pemayuh temuai ari menua bukai ke Sarawak ti nyangka manggai lima juta ujung taun tu.
“Tagit aku taun tu deka nyapai empat juta iku temuai, lalu aku andal amat kitai deka nyapai tagit nya ba bulan September, lalu ba bulan Disember kitai deka nyapai penyampau ke pemadu tinggi ke kala dijapai ba taun 2019 enggau penatai 4.2 juta iku temuai.
“Aku enda tekenyit enti taun tu kitai ulih nyapai lima juta iku temuai, tang udah chukup enti kitai ngelui tagit empat juta ti dipelabaka aku ulih dijapai manggai ba bulan September tauka Oktober taun tu,” ku iya.
SUKMA 2024 deka nyadi saksi 37 bansa lumba enggau main ti dipekit ti ngaul 488 pekit ti mungkur 236 pekit ngaul achara lelaki, 217 pekit achara indu enggau 35 agi pekit champur lelaki enggau indu, kelimpah ari ngempuruka 12,619 atlet enggau pegawai
SUKMA ti di kelala ari taun 1986 udah diatur dua kali di Sarawak sebedau tu iya nya dalam taun 1990 enggau 2016. -TVS
