SARATOK, 11 Julai: Rumah panjai baru Sungai Entangor di Batu Burak ditu berupai mandangka semangat penyerakup enggau tuai runding dalam politik lebih agi di Saratok.
Kaban Kunsil Nengeri (ADUN) Kalaka, Mohd Duri madahka, pemutus deka begulai ba baruh siti perabung taja asal penatai ti bebida ukai siti pemutus ke mudah ungkup dijapai nyema isu politik enggau ke bukai dipetalatka sekeda pengani ba rumah panjai nya.
“Mayuh sida tu datai ari menua asal ti bebida, bisi nya ari jauh, baka ari Kapit, Sarikei, Kalaka, Saratok enggau sitak Krian tang sida beserakup dalam sebuah (rumah panjai betuaika) Bidah anak Tambi ke ngembuan 21 pintu.
“Udah tu ila sida deka diau serumah taja ngembuan penemu politik ke bebida, tang sida tetap beserakup ba rumah panjai,” ku iya.
Iya bejaku munyi nya ngagai TVS pengudah bejadika Pengawa Nasih Tanah Taba Rumah Panjai Baru Sungai Entangor Batu Burak di Roban, kemari.
Tandu iya, pemansang nya mega senutuk enggau juluk perintah Gabungan Parti Sarawak (GPS) ba baruh pegai Premier Sarawak, Datuk Patinggi Tan Sri Abang Johari Tun Openg ti deka tetiap iku rayat ba wilayah tu terus beserakup.
Berebak enggau nya, raban iya mega deka terus mantu tetiap rumah panjai enggau genturung pendiau ba DUN Kalaka nengah agih belanja Transformasyen Menua Pesisir (RTP) enggau Projek Mit Menua Pesisir (MRP) sechara begintir udah tu ila.
Nangkan ke nya, Tuai Rumah (TR) Bidah Tambi, 65 taun, beterima kasih ngagai pengari rayat GPS di Saratok laban udah ngemujurka juluk ati iya enggau sida serumah ngentak rumah panjai baru.
“Aku meri terima kasih lalu enggai enda madahka pengaga ati aku ke berekat sukung tulung ari YB Friday anak Belik, pia mega bantu ari YB Mohd bin Duri YB laban udah bebendar endar nyukung projek (rumah panjai baru) kami tu,” ku iya.
Udah nya, Bidah madah bantu ari pengari rayat mega endang besai reti ngagai sida, lalu iya besemaya deka nguna bantu agih belanja ke diberi enggau manah dikena nembuka nembuka projek rumah panjai sida.
Rumah Bidah Tambi di Sungai Entangor Batu Burak iya nya rumah panjai keterubah di Saratok ke diuan pengani ti datai ari menua ke bebida sereta ukai sama kaban belayan.
Naka ke diatu, penyampau semua rumah panjai bisi ba sitak dun kalaka iya nya 36 buah.-TVS
