SIBU, 11 Julai : Pengawa ngaga jematan kedua pemadu panjai di Sarawak iya nya Jematan Batang Lassa disadang tembu kena 22 Disember tu ila.
Kaban Kunsil Nengeri (ADUN) Daro, Safiee Ahmad madah, pemansang ke pemadu baru projek nya ti beungkus RM600 juta benung ba renggat nyambung fizikal jematan nya.
“Enti diperatika ari sukut fizikal jematan nya endang udah disambung, nitihka penerang pemadu baru jematan nya deka tembu kena 22 Disember, ujung taun tu projek nya deka tembu penuh,” ku iya madah ngagai pemberita, sehari tu tadi.
Kelimpah ari nya, Safiee ngaku pengagit rayat Daro ti enda sabar deka ngasaika perengkaguna nya.
Nitih ku Safiee, pengawa bejalaika projek nya ngayanka pengeran perintah neruska projek nya ke pemaik semua rayat.
Ku iya, Jematan Batang Lassa deka nyungkak pemansang lalu enggau nya nyungkak potensial ekonomi Daro ti sinonim enggau pengawa ngeluarka produk betanam betupi enggau berikan.
Berebak enggau nya ku iya, Perintah Sarawak nengah Ejensi Pemansang Delta Rajang (RADDA), ngungkupka RM200 juta dikena bejalaika pemansang ba kandang menua Daro.
Pengawa ngemanahka perengkaguna bukai baka bekal ai, karan enggau perengkaguna betanam betupi, kelebih agi ba sitak DUN Daro ari baruh administrasyen bagi menua Sarikei mega deka terus dipejalaika  dalam timpuh ke panjai .
“Pia mega enggau projek RTP ungkup sitak N.43 Daro ari baruh administrasyen bagi menua Sarikei, aku beterima kasih laban semua projek ti dipejalaika taun nyin kemari bejalai enggau lanchar.
“Kami deka neruska pengawa bejalaika projek RTP 2024 ungkup sitak tu,” ku iya.
Bekaul enggau perambu ngaga jalai alun ari Muara Lebaan ngagai jalai besai Sibu Tanjung Manis, Safiee nerangka projek nya deka berengkah digaga enggau naka pengelengkas nyengkaum enggau nyukat tembu penuh enda lama agi.
“Projek ti beungkus RM65 juta nya deka meri pemaik besai ngagai rayat Sungai Sian ti tebilang enggau asil betanam betupi,” ku iya.-TVS
