KUALA LUMPUR, 5 Julai: Teknology 5G ngemeranka pengawa ti beguna dikena ngemansangka digital menua nengah chara nerenakka pengawa dagang sereta ngemansangka dagang mit enggau jelan pemesai (PKS) di Malaysia, ku Menteri Komunikesyen enggau Digital, Fahmi Fadzil.
Ku iya, pangka 5G ngagai ekonomi menua mega dikearap ulih nambahka Pemansut Asil Kasar Dalam Menua (KDNK) nengah chara nempa servis enggau industri baru, nempa model dagang baru kelimpah nambahka produktiviti enggau penyikar iya, ba mayuh bengkah ‘touch point’ ti bebida.
“Pemansang 5G setipak enggau juluk perintah deka meda penumbuh inklusif sereta nentuka digitalisasyen meri pemaik ngagai semua serak mensia mayuh,” ku iya.
Iya madah munyi nya lebuh bejaku ba pengawa betukar Sempekat Pemerati Ati (MoU) entara Komiti Komunikasyen enggau Multimedia Malaysia (SPKS) enggau Kaunsil Pemansang Pemeranak Puku Malaysia (MIDA) ditu, empai lama.
Bekaul enggau MoU nya, Fahmi madah, iya ngembuan juluk ngambika sektor vertikal enggau PKS beambi ulih ngena teknologi 5G.
Iya madahka, nengah MoU nya, MCMC deka nyendiaka sukung teknikal enggau latih ti nyadi sebagi ari penyikap nuju intergrasyen 5G, kelimpah ngemeratka guna pemansang teknologi 5G ngaul sekeda industri.
MIDAÂ megai tanggungpengawa ngelala kompeni ti bisi potensial ti ulih beambi ulih ari teknologi 5G dalam ngemansangka dagang sida empu.
“Chara nya deka ulih nentuka pengawa ngena 5G enggau jampat sereta efisyen sereta nangkup guna mayuh bengkah sektor.”
“Nengah pengawa begulai tu, perintah deka muka penuh potensial 5G, meransang inovasyen, ngubah industri sereta nempa Malaysia ti lebih besambung.
“Aku ngarapka enggau pengawa nyain MoU tu, iya deka muka leman baru ungkup sektor vertikal enggau PKS di menua tu ngambika lebih kompetitif sereta nambahka produktiviti dalam ngatur pengawa dagang,” ku iya. – TVS
