BINTULU, 4 Julai: Kerejasama entara Sarawak Skills enggau Palan Latih Teknologi Tinggi (ADTEC) Bintulu ulih ngerapitka seraka entara latih enggau guna industri.
Premier Sarawak, Datuk Patinggi Tan Sri Abang Johari Tun Openg madah, nengah pengawa ngatur program latih bepelasarka peneka spesifik mayuh bengkah sektor, raban graduet ulih disikap enggau pengelandik ke diguna pengaji.
“Nengah chara ngerintaika program latih enggau guna spesifik mayuh bengkah sektor, nya deka ulih nentuka graduet kitai udah sedia gawa sereta disikap enggau pengelandik ti digiga pengaji,” ku iya.
Teks jaku iya dibacha Menteri Pelajar, Inovasyen enggau Pemansang Bakat Sarawak, Dato Sri Roland Sagah Wee Inn ba Pengerami betukar Sempekat Pemereti Ati (MoU) antara Sarawak Skills enggau ADTEC Bintulu ditu, kemari.
Ku Abang Johari, latih ti udah ditetapka guna industri nya ukai semina deka nambahka pemakit tang mega meri pangka ngagai penumbuh enggau pemansang ekonomi Sarawak.
Kelimpah meri penguntung ngagai bala nembiak, kerejasama ke baka tu mega deka nambahka profesionalisme bala pengajar ba institusyen pengelandik nya.-TVS