KUCHING, 4 Julai: Bisi 15 iku indu mungkur enam iku peranak lokal enggau semilan peranak menua luar ti dipelabaka ejen servis temuai (GRO) ditangkap nengah Op Noda ti dipejalaika ba lima buah palan pemerindang di kandang mengeri Kuching.
Raban khas IPD Kuching udah bejalaika Op Noda enggau Op Pusat Hiburan ba sekeda palan pemerindang ngelinggi Kuching kena 2 Julai, pukul 10.55 malam.
Tuai Polis Pelilih Menua Kuching (ACP) Ashmon Bajah nengah sebengkah penerang sehari tu tadi madahka, 17 iku lelaki peranak lokal ke nyadi temuai mega ditangkap.
“Semua saspek ari menua luar nya diriman pengelama 14 hari nitihka seksyen 51(5)(b) akta imigresyen 1959/63 ketegal penyalah ngelanggar syarat pasport, permit enggau pas garis entara menua, lalu saspek menua tu diriman pengelama empat hari,” ku iya.
Nengah penerang iya, kes nya dipansik ari baruh Seksyen 372 Kanun Keseksaan ba penyalah ungkup tuju nyundal ti nyendiaka ukum jil nyentuk 15 taun sereta lunsin.
“Kes deka dipansik nitihka Seksyen 39(b) Atur Imigresyen 1963 ketegal penyalah ngelanggar tauka puntan nitihka sebarang atur ti ditetapka bekaul enggau atur ti udah dikemendar ba sebarang pasport, permit tauka pas garis entara menua ti nyendiaka ukum jil enda lebih ari enam bulan tauka diukum enda lebih ari RM1,000 tauka kedua-dua jil enggau ukum nya,” ku tandu iya .-TVS