KUCHING, 4 Julai: Tanggungpengawa Tuai Komuniti enggau Tuai Raban Bansa (KMKK) beguna amat dalam ngurangka penyalah vandalisme ngagai perengkaguna utiliti enggau telekomunikasyen di Sarawak.
Premier Sarawak, Datuk Patinggi Tan Sri Abang Johari Tun Openg madah, KMKK begunaka bantu pengari rayat enggau Polis Diraja Malaysia (PDRM) nagang penyalah vandalisme.
“KMKK enggau pengari rayat begunaka kerejasama enggau PDRM dalam ngangkatka disiplin komuniti nengah kimpin penyedar vandalisme baka ngeripot sebarang pengawa ti diasai salah.”
“Kitai patut ngemanahka agi disiplin ngambika kitai ulih ngetanka pemaik di Sarawak,” ku iya.
Iya madah munyi nya lebuh bejaku ba Pengerami Ngelancharka Kimpin Nagang Vandalisme Ngagai Perengka Guna enggau Telekomunikasyen 2024 ba Palan Konvensyen Borneo Kuching (BCCK) ditu, kemari.
Tandu iya, KMKK patut ngemata sitak diri empu ngambika ngemuntangka PDRM nyidi orang ti ngereja penyalah bekaul enggau isu nya nengah chara bejalaika pengawa matau enggau bantu komuniti menua nya.
“Disiplin rayat Sarawak enda tau enda tinggi, enti bisi meda ulah ke salah, kita patut ngeripot terus ngagai piak ke bekaul baka polis enggau KMKK.
“KMKK mega patut gawa bebendar baka aku enggau bala ketuai bukai, enti sida bejalaika tanggungpengawa enggau manah, kitai deka nyiri baru sida laban rayat beguna agi ari individu,” ku iya.-TVS
