BETONG, 4 Julai: Raban nembiak di Sarawak lebih agi ke diau di kandang menua Betong diatu bepeluang nyereta Kus Nenun Pua Kumbu ti disediaka ba Kampus Satelit Institut Krafjari Menua (IKN).
Penulung Pegawai Latih (IKN) Kampus Satelit Betong Andy Jawa Roti madahka penyereta ke diterima masuk belajar dia deka diberi penerang ari pun nyentuk ke ujung senentang proses ngaga pua kumbu pengelama setaun enam bulan.
“Kebendar mayuh sida ba luar (din) nya landik nenun tang sida nadai setipikit tang ditu ila sida deka dilatih ari pun nyentuk ujung.
“Ari nya (pemisi setipikit), sida ulih gawa enggau perintah tauka nampung pelajar ngagai institut pelajar tinggi ba endur bukai.
“Tu mega ulih nempa sida nyadi pedagang, laban bala ari raban krafjari deka mantu sida ari segi kereban nyentuk ke sida iya mujur,” ku iya.
Udah nya, Andy madah agi raban penyereta (ari jauh) ti ngembuan pengerindu enda ibuh nangi laban nya disedia buding pechuma, kelimpah kos makai enggau ngirup nyengkaum elaun penyampau RM120 sekumbang sida nembuka kus nya.
“Buding ambika chunto disediaka pechuma, pia mega makai ditanggung semua.
“Ari sukut elaun, bisi diberi RM120 sebulan nyengkaum perengkaguna enggau kereban pechuma.
“Nya alai, aku meransang semua raban nembiak ke bisi minat ngansah penau diri nenun Pua Kumbu ulih datai kitu ngerejister diri ba Kampus Satelit IKN Betong Sarawak,” ku iya.
Nangkan nya, iya madah penyereta ti mujur nembuka kus nya deka diberi Setipikit Pengelandik Malaysia (SKM) Kelas Tiga.
Udah nya, ku iya peminta ungkup kus tu tebuka ngagai semua chalun lelaki enggau indu ti beumur entara 18 nyentuk 35 taun.
Pengawa ngatur kus nya mega ku iya madah sebagi ari inisiatif perintah nengah IKN dikena ngangkatka industri ngaga krafjari ti bepelasarka pua kumbu.
Kenyau ari taun 2021, IKN Kampus Satelit Betong ngembuan 13 iku penyereta Kus Nenun Pua Kumbu enggau tujuh ari pesereta nya deka nembuka kus sida ba bulan Julai enggau Disember tu ila.-TVS
