KUCING, Julai 3: Sarawak ngerikod pengerugi manggai urung RM20 juta bekau ari kes vandalisme ngagai perengkaguna infrastruktur utiliti enggau telekomunikasyen ti ngaul 1,406 kes naka taun 2023.
Ku Menteri Utiliti dan Telekomunikasi Sarawak, Dato Sri Julaihi Narawi madah, bisi empat sektor ti napi pengerugi ketegal kes ngerusak reta tengkira tauka budaya vandalisme.
“Bepelasarka rikod Polis Diraja Malaysia (PDRM) enggau ejensi ti bekaul, sektor telekomunikasyen ngerikod sepenyampau 1079 kes vandalisme enggau anggar pengerugi RM15.8 juta.
“Sektor bekal karan ngerikod sepenyampau 266 kes enggau anggar pengerugi RM3.6 juta lalu sektor bekal ai sepenyampau 57 kes enggau anggar pengerugi RM244,000,” ku iya.
Julaihi Narawi madah munyi nya maya Pengerami Bejadika Kimpin Nagang Vandalisme Ngagai Perengka Guna enggau Telekomunikasyen Sarawak ba Palan Konvensyen Borneo Kuching (BCCK) sehari tu tadi.
Ku iya nerang, sektor keempat iya nya sektor ngagihka gis bisi empat kes enggau anggar pengerugi RM30,500.
Kelimpah ari nya, penanggul vandalisme enda patut diambi mudah laban nya tau ngenataika penusah ngagai mensia mayuh sereta ngeruga perintah, lalu iya mega ngeruga pengelikun diri empu baka risiko kena tangkap karan.
“Penanggul vandalisme nya ngujungka perintah nanggung ungkus besai kelebih agi ba ungkus nukar perengkaguna ti udah dirusak,” ku terang iya.-TVS
