SARATOK, 3 Julai: Agih belanja sepenyampau RM300,000 udah dikemendar dikena ngetar jalai alun 600 meter pemanjai nuju Rumah Panjai August Sambow di Kawit Asal Saratok.
Kaban Kunsil Nengeri (ADUN) Krian Friday Belik madah agih belanja nya udah dikemendar dibaruh Sistem Penerang Rikod Jalai Malaysia (MARRIS).
“Nya alai, aku udah berandau enggau Tuan D.E JKR nanyaka nama perambu dikena ngenembuka jalai masuk Kawit.
“Nya alai D.E madah iya udah masuk ba program dikumbai sida MARRIS ba taun 2024 ke udah ngungkupka belanja dikena nembuka jalai kitai di Kawit ditu,” ku iya.
Iya madah munyi nya maya Pengerami Ngiling Bidai Gawai Dayak 2024 diatur Komiti Pengelantang enggau Pengelikun Genturung Pendiau (JKKK) Rumah Panjai August Sambow Kawit Asal Krian Saratok, kemari.
Ku iya, naka tu raban Opis Kereja Raya (JKR) benung nyendiaka dokumen tinda enggau ngaga tempa tukuh ungkup projek jalai nya.
Berebak enggau nya, Friday nangkan bala Tuai Raban Bansa engau Tuai Rumah (KMKK) ba sitak Kunsil Nengeri (DUN) Krian patut regas agi ngulihka timbal penerang ari nembiak redak diri.
Tandu iya, timbal ari rayat renggat baru chukup beguna ngagai iya dikena nentuka genap perambu pemansang ulih dipejalaika enggau lanchar.
Penembu Projek Ngetar Jalai Ke Rumah Panjai Kawit ila deka ngujungka semua jalai besai ngelawa rumah-rumah panjai di Krian udah tembu ditar penuh.
Ba pengerami ke sama Friday bisi meri timbal senentang kerejasama Perintah Sarawak enggau sebuah Serikat Minyak Thailand PTT Exploration And Production Public Company Limited (PTTEP) endang ngelai ekonomi ba wilayah tu majak manah.
Ku iya, nya nandaka serikat ari menua luar tebuka ati bekerejasama enggau Perintah Sarawak dalam bemacham bidang lebih agi dalam indutsri minyak enggau gas.
“Aku ngasai tu ngelai serikat-serikat ari luar udah mandangka pengingin deka bekerejasama enggau Perintah Sarawak.
“Tu siti kelai manah ngagai pemansang ekonomi di nengeri tu,” ku iya.
Sebedau tu, Premier Sarawak Datuk Patinggi Tan Sri Abang Johari Tun Openg bisi nyebut Sarawak udah tu ila deka bekerejasama enggau Serikat Minyak PTT Exploration And Production Public Company Limited (PTTEP) di Thailand ungkup pengawa bekaul enggau gas masam di nengeri tu.-TVS
