SARATOK, 3 Julai: Rayat ba sitak Kunsil Nengeri (DUN) Krian enggau Saratok diperansang patut terus meri sukung ngagai pengari rayat Gabungan Parti Sarawak (GPS).
Kaban Diwan Negara Senator Pele Peter Tinggom madah, mayuh projek pemansang udah dipejalai enggau benung diperambu pengari rayat GPS di Krian lebih agi nengah Ejensi Pemansang Bagi Menua Betong (BDDA).
“Kitai ba Saratok berasai betuah laban bisi YB Friday bisi YB Mohd Haji Duri semua YB (pengari rayat) tu tadi ulih nyalurka belanja dikena ngatur pemansang menua kitai ditu.
“Nyadi kitai anang kakang nyukung (pengari GPS) nangika agih belanja RM200 juta tu pulai ngagai menua bukai,” ku iya.
Iya madah munyi nya maya Pengerami Ngiling Bidai Gawai Dayak 2024 ba Rumah Panjai August Sambow Kawit Asal Krian Saratok, kemari.
Ku iya, rayat di Krian deka rugi enggau tinggal pemansang nyema nguji bekalih sukung ngagai pengari bukai.
Nya alai, diatu rayat Krian mesti pintar enggau ngembuan timpai ke jauh dalam nentuka sapa pengari rayat enggau parti ke ulih terus meri pengelantang ngagai sida dudi hari.-TVS