SARATOK, 3 Julai: Kaban Diwan Negara Senator Pele Peter Tinggom ngasaika pekara dibantaika Sapit Menteri Besai Dato Sri Ahmad Zahid Hamidi pasal Projek Nyambung Grid Karan Nasional di Belaga empai lama nyadi perais ke chukup besai reti ungkup penaluk rayat ba sitak nya ngagai perintah.
Ku iya, berita nya tentu meri pengaga ngagai rayat Belaga ke udah chukup lama randaka perengkaguna nya.
“Rayat Belaga ke agi bulih sambung grid karan tentu berasai gaga enggau berita manah ke udah dibantaika Sapit Menteri Besai (Dato Sri Ahmad Zahid Hamidi).
“Sida di Belaga udah mantu ngemujurka pemansang iya nya ngemendarka pengawa ngaga Tekat Hidro Karan Bakun enggau Tekat Hidro Karan Murum.
“Ukai semina nya aja tiap kali pengawa bepilih besai enggau pengawa bepilih besai nengeri kenyau ari taun 1980-an (sida) meri mandangka penuh ngagai pengari GPS tauka suba dikumbai Barisan Nasional (BN),” ku iya.
Iya madah munyi nya lebuh meri timbal pasal agih belanja RM62 juta dikena ngaga grid ba DUN Belaga baka ke udah dibantaika Datuk Sri Ahmad Zahid Hamidi sebedau tu.
Tandu iya, nengag penembu projek nya ila deka nyadi siti agi pematak ngagai pemeranak puku ke deka beranakka puku ba Belaga enggau Hulu Rejang seraya dikena nyungkak sosio ekonomi rayat ke diau besemak.
Nya alai, iya ngarapka projek nyambung grid nya ulih dikemujurka enggau lengkas.-TVS
