KUCHING, 3 Julai: Kaunsil Dagang Antarabansa (ICC) deka nempa kerejasama enggau Perintah Sarawak nyadi orang tengah dalam mutarka penyarut dagang ke tau nyadi enggau kompeni antarabansa jemah ila.
Presiden Kort Timbang Tara Antarabangsa (ICC), Claudia Salomon madah, ICC beguna ngagai Sarawak laban pelilih menua tu diatu nyadi palan fokus ungkup pengawa beranakka puku ari menua luar.
“Kami nemu mayuh pengawa beranakka puku ari menua luar dipejalaika ditu, nya alai kitai ngarapka Sarawak deka ngaga ICC Arbitrasyen nyadi orang tengah ke ulih dikearap dikena mutarka sebarang penusah.
“Kami mega ngarapka ulih nempa kaul ti rat enggau Perintah Sarawak,” ku iya.
Iya madah munyi nya lebuh dirandau media pengudah nemuai meri basa ngagai Premier Sarawak, Datuk Patinggi Tan Sri Abang Johari Tun Openg ba Wisma Bapa Malaysia, sehari tu tadi.
Salomon madah, pemerat Perintah Sarawak setipak enggau misyen teras ICC ti ngemeratka pengawa merintah, pemansang enggau pengelantang ekonomi.
Berebak enggau nya, ICC mega bisi ati deka nyendiaka sereta ngemansangka program pelajar ungkup luyar di Sarawak, kelimpah nirika kapasiti.
“Kami deka ngaga program pelajar ti tinggi ngambika mayuh agi luyar ti nyendiaka kontrak rentas garis entara menua nemu pangku pengawa rega arbitrasyen ICC,” ku iya.
ICC bejalaika tanggungpengawa dalam ngangkatka dagang tebuka, pengawa ngatur diri dagang, ngelaban penyalah makai suap enggau pengawa jai komersial ba renggat entarabansa. -TVS
