KUCHING, 2 Julai : Perintah Sarawak udah ngemendarka belanja dike a ngemanah infrastruktur bekal karan ba lima pelilih menua mungkur sitak Asajaya, Sadong Jaya, Sebuyau, Simunjan, Gedong.
Menteri Utiliti enggau Telekomunikasyen Sarawak, Dato Sri Julaihi Narawi madah, nengah opis menteri iya enggau ejensi ti bejalaika projek iya nya Sarawak Energy Berhad, projek nya beungkus RM174 juta ti mungkur tujuh komponen bekal karan.
“Tu betuju dikena nentuka penegap bekal karan ba semua kandang endur tu ke diatu bisi penambah peminta bekal karan seriris enggau ubah gaya pengidup ke lebih menyana,” ku iya rambau bejaku ba Pengerami Ngiling Bidai Pelilih Sebuyau kena Hari Enam tu tadi.
Nerang silik, Julaihi ke mega Kaban Kunsil Nengeri (ADUN) Sebuyau madah, skop projek mungkur pengawa ngadu litar bergembar MVCC ari Substesyen Asajaya 33/11kV ngagai Jematan Batang Sadong.
Kelimpah ari nya, kabel dalam sungai begembar 95 mm2/3C XLPE Cu meraka Sungai Batang Sadong mega deka dipejalaika.
Infrastruktur tu mungkur konduktor disalut litar tunggal 33kV ari Batang Sadong ngagai Terminal Feri Sebuyau.
Ku iya, litar tunggal 33kV besalut mega deka dipasang ari Pasar Simunjan ke Gedong.
Sarawak Energy mega deka ngadu litar 33kV ari Jematan Batang Sadong ngagai Pasar Simunjan.
Litar tunggal 33kV ti disalut mega deka dipasang ari Pasar Simunjan ngagai Gedong.
Ungkus nya mega nyengkaum ngangkatmanah transformer enggau kereban elekterik (VT/VR).
Siti substesyen deka digaga ba Sebuyau.
Nangkan ke nya, sebagi ari atur timpuh pandak bekaul enggau penanggul bekal karan, iya madahka Sarawak Energy bekerejasama enggau opis pelilih menua sereta tuai raban bansa udah dipinta ngelala bagi palan nya.
“Entara nya baka kayu ti patut ditebang ba semak tali karan lalu pengawa ngerusak enggau enchuri kabel karan mega deka seruran dipatau,” ku iya.-TVS
