SARATOK, 1 Julai: Bala penyereta Pekit Krian MTB ECO Jamboree bela madah diri berasai tepantup ati lalu sida gagit agi deka masuk pekit nya ba taun baru.
Siku pelumba ari Giant Racing Team ke mega ex-Pelumba Ensikal Nasional Azizulazli Shaari madah, inisiatif ngatur Krian MTB Eco Jamboree siti pekit ke chukup manah dikena ngiga bakat baru dalam lumba nya di menua tu lebih agi ari Sarawak.
“Ungkup pemansang ditu aku meda mayuh pelapis ari pelumba-pelumba Nengeri Sarawak tu.
“Pelapis mayuh nyadi ansah bakat nya lalu atur mayuh agi program lumba ba Sarawak tu dikena ngiga mayuh agi bakat dibai ngagai renggat tinggi.
“Eco Challenge Jamboree tu endang chukup mar neresa kampung gadung, sungai niki bukit ke tinggi lebak ke tinggi lalu ditu aku ngasai chukup rindu laban nanjak nya endang rindu mih lalu orang Sarawak ditu semua iya manah nyadi tabi puji ngagai semua pengatur,” ku iya maya dirandau pemberita pengudah tembu pekit nya.
Udah nya ba penemu Laurel Lauridsen Adrian ke ngelumba ngarika Ghost Speed Racing Team WJ, madah diri chukup tepantup ati enggau genap kategori pekit laban ngaul semua renggat umur.
“Ungkup taun tu mayuh kategori, au ungkup Tetup Betong, Indu, Junior, Veteran nyengkaum Master B pan bisi.
“Nyadi chukup manah laban meri peluang ngagai semua kategori sama niki podium…Nyadi ngagai orang bukai taun baru YB madah agi bisi ensikal bukit ulih nguji datai baru sereta nyikap diri manah agi,” ku iya.
Udah nya, ba pelumba Tim Pemansang MTB Sarawak Muhammad Fiqri Iqbal Kadir madah, peneleba ke diulih iya ari pekit nya chukup besai reti sebedau iya nyereta Pekit Lumba Malaysia (SUKMA) bulan Ogos tu ila.
“Tu keterubah iya aku tama Krian tu, aku pan belumba ungkup nengeri nyadi tu dikira dikena belatih mih dikena nyikap diri ungkup SUKMA ila.
“Nyadi pekit tu endang manah, mar ari segi bukit, jalai iya bisi neresa sungai,” ku iya.
Bisi enam kategori pekit diatur taun tu iya nya Kategori Master A, Master B, Nembiak Tebuka, Lelaki Tebuka, Indu Tebuka enggau Tetutup Betong.
Ba Kategori Master A, ngemataka Azizulazli Shaari ari Giant Racing Team ngempu gelar champion.
Udah nya, tim Pro Apparel Sarawak menang ba Kategori Master B nengah pelumba sida iya nya Sufian Nor.
Champion ungkup Kategori Nembiak Tebuka diempu Tim Pemansang MTB Sarawak nengah Muhammad Fiqri Iqbal Kadir.
Lalu ba Kategori Lelaki Tebuka, Indu Tebuka enggau Tetutup Betong sida ke menang iya nya Laurel Lauridsen Adrian, Jong Mei Ting enggau Amir Asyraff Amin.-TVS
