LIMBANG, 1 June: Projek Ngaga Jalai Besai Sarawak Sabah (SSLR) ke nyambung sitak Miri, Limbang, Lawas enggau lanjur ke Sabah deka meri pemaik ngagai mensia mayuh.
Sapit Menteri Industri Pemakai, Komoditi enggau Pemansang Wilayah Sarawak, Datuk Dr Abdul Rahman Ismail madahka, projek SSLR ke diatu benung ranchak digaga nya deka ngangkatka landskap ekonomi rayat nyengkaum di sitak Medamit.
Kaban Kunsil Nengeri (ADUN) Bukit Kota nya nambah, ungkup limbang, projek SSLR nyerangkung sekeda fasa ngaul pasar Medamit ke Rumah Thaddeus, Pulau Brunei ke Pelilih Lawas.
”Projek Sabah, Sarawak Sabah Link Road SSLR ti ngaul Lawas,Limbang, Miri enggau Sabah benung ranchak digaga maya diatu enggau mungkur sitak di Medamit.
“Projek SSLR di sitak Medamit tu bisi sekeda fasa iya nya ari jalai pasar Medamit ke Rumah Thaddeus, Pulau Brunei enggau ke Lawas ti benung ranchak dipejalaika.
“Pengudah nya projek jalai alun ari pasar Medamit ke Rumah Thaddeus agi diperunding taga penyauh jalai lalu deka nyadi nyata enda lama agi,” ku iya.
Dr abdul rahman madah munyi nya rambau Pengerami Makai Lemai Tebuka Gawai Dayak nyerumba Pesta Medamit 2024 diatur ba Diwan Tebuka, Nanga Medamit ditu.
Iya nerang Projek Jematan ti ngaul pasar Medamit ke jalai SSLRr diatu agi dalam proses tinda.
Ku iya, sepenembu jematan nya ila deka ngemudahka pemindah peranak di Medamit ke seberai sungai ti nadai nguna perau agi.
Ku iya, projek bukai ti deka diasai peranak di Medamit iya nya projek anjung orang dagang ke udah tembu penuh lalu diatu semina nganti deka diserahka.
Kelimpah ari nya, ku iya , Waterfront Medamit ti udah tembu enggau nyadi palan besai ungkup Pekit Bot Laju nyerumba Pesta Medamit diatu agi nganti kereja nyambung bekal karan.-TVS