BELAGA, 1 Julai: Pelilh Belaga deka ngasaika pemaik ari pemisi arus bungkur 5G enda lama agi.
Sapit Menteri Utiliti enggau Telekomunikasyen Sarawak, Datuk Liwan Lagang madahka, rentayan 5G nya deka diasai rayat di sitak nya dalam kandang dua nyentuk tiga bulan agi.
”Dalam timpuh dua tauka tiga bulan agi 5G deka bisi di Belaga, serata Sarawak deka bisi 5G kelimpah ari pelilih Kapit,” ku iya.
Liwan ke mega Kaban Kunsil Nengeri (ADUN) Belaga madah munyi nya rambau Pengerami Nangguhka Pesta Adet Saviek Kajang ba Long Liten Belaga malam ensana.
Udah nya, lebuh nerang silik Liawan madah siti palan digital deka digaga di pelilih nya.
“Tu deka ngambi timpuh dua ke tiga bulan enggau palan tu ila deka beoperasyen ba Tabung Amanah Bakun di pasar Belaga.
“Udah tentu deka ngerembaika agi bungkur nya ungkup pedaja,” ku terang iya.
Pesta Saviek ti diatur serak tu, ku iya ulih nyerakupka semua pupu bansa ke bisi di Sarawak.
“Pesta tu ukai semina ngempuruka etnik Orang Ulu, enggau mandangka adat asal ke dipelajar kitai ari aki ini tang enti kitai berati malam tu kaban kitai Melayu mega bela enggau ngerichahka pesta ke diatur tu.
“Kitai enda meda penatai, pengarap enggau bansa, semua kitai begulai dalam ruang bilik besai pelilih Belaga,” ku iya.
Ungkup pengatur Pesta Saviek serak tu, Liwan udah ngungkupka agih penyampau RM30, 000 ngagai Gerempung Kajang.
Ba pengerami nya, iya mega bisi ngungkupka RM10, 000 agih belanja tambah ngagai gerempung kelai muji pemujur program ti diatur taun tu.-TVS
