PUSA, 1 Julai: Kunteriktor Projek Jematan Batang Saribas 2 diberi timpuh dua minggu dikena mutarka penanggul bekaul isu suntuk pengereja pengawa enggau perengka pengangkut ti nyadi ba taba nya berengkah sehari tu.
Sapit Premier Sarawak, Datuk Amar Douglas Uggah Embas madahka, atur drastik nya dipejalaika dikena nentuka sebarang isu projek laun tembu enda nyadi ngagai projek ti begunaka ungkus sepenyampau RM385 juta nya.
“Kitai meri sida timpuh pengelama dua minggu dikena mutarka isu ke nyadi ba taba projek, tebal agi isu suntuk pengereja pengawa enggau perengka pengangkut nyengkaum bisi skop kereja ti patut udah dipejalaika tang agi bedau dipejalaika.
“Nyadi, JKR udah meri timpuh dikena sida mutarka tetiap isu ke nyadi laban diatu projek nya udah laun 34 hari enggau IOT udah diberi.
“Utai ti dipadahka enda sebaka enggau gaya ba taba enggau kami deka terus matau sechara dampih.
“Nya alai, JKR meri sida timpuh dua minggu dikena mutarka sebarang isu sebedau kami ngambi atur ke bukai nyema enda nitihka penetap ke udah ditetapka,” ku iya.
Iya mansutka pekara nya pengudah licha enggau pengawa ngabas enda lama ngagai taba Projek Ngaga Jematan Batang Lupar Dua, sehari tu tadi.
Ku iya, sebagi ari atur dikena nentuka nadai projek sakit nyadi ba semua projek perintah, raban JKR udah bejalaika prosedur baru.
Tetiap kunteriktor ti diberi projek mesti ngepunka pengawa sida dalam timpuh sebulan pengudah proses ngambi taba projek.
“JKR Sarawak diatu meri perati berat dikena nentuka nadai agi projek sakit.
“Nya alai, kami bejalaika prosedur tu ngagai kunteriktor baru, ke alai sida mesti bejalaika kereja ba taba dalam timpuh sebulan pengudah ngambi taba nya.
“Nyema sida enda nitihka penetap nya, kunterik sida bisi potensyel ungkup diketuka,” ku iya.
Ku iya, prosedur ti dipejalaika nya ukai dikena ngenusahka raban kunteriktor tang ngembuan tuju dikena nentuka pengawa ngaga sesebengkah projek nya ulih bejalai enggau lanchar.
Taja pan pia, iya madahka, iya andal pengawa ngaga Jematan Batang Lupar 2 ulih ditembuka nitihka haribulan ke udah ditetapka.
Sama bisi datai nyempulang pejalai Uggah, Direktor JKR Sarawak Dr Cassidy Morris enggau ke bukai.-TVS
