KUCHING, 1 Julai: Chura kelingai suah dikaitka enggau budaya sesebengkah pupu bansa ti ngembuan reti kediri empu, ngarika kaul, peturun sereta pesaka asal enggau turai tukuh ti mandangka garis chelum tauka chura geometri ari seni jeman kelia.
Kelimpah ari nya, bisi mega simbol khas ngelai asal pun penatai kelingai nya, sekalika ngarika kaul mensia enggau identiti sereta pengarap sesiku orang.
Siku Pengukir Kelingai, Wilma Gispilli madah, tetiap chura kelingai ti diasilka ngembuan reti kediri empu baka chura kelingai ari menua iya empu, Filipina.
Iya mega ngasaika chura kelingai di Filipina bisi sebaka enggau kelingai bansa Iban di Sarawak.
“Tu mih budaya kelingai kami ba Filipina, aku bejalai ke serata dunya dikena bekunsika senentang kami ngembuan budaya kelingai, nya endang sebaka enggau kelingai Iban, iya nya kelingai tulin.
“Kami ngasai baka bisi kaul laban sida (Iban) mega sama, ngembuan orang ngayau pala, kami mega ngembuan orang ngayau pala,”ku iya maya dirandau pemberita ba taba Rainforest World Music Festival (RWMF) 2024.
Nangkan ke nya, iya madah dalam mayuh budaya, pengerindu ngagai kelingai sesebengkah bansa mega majak nambah.
Ku iya, nya kebuah ba komuniti Iban, kelingai sebagi ari pesaka asal ti mai reti ke besai dalam budaya etnik nya di Sarawak.
Tetiap ukir, garis enggau turai tukuh chura kelingai ngelambangka reti tetentu ke bekaul enggau petara, status sereta tikas pemujur sesiku orang.
Baka bansa Iban, sesebengkah bansa di Filipina mega ngembuan chura kelingai ti bisi mayuh reti.
“Chura kelingai ngembuan reti ti signifikan bekaul pengerai, nyaga, malin, pemerani enggau pemajik.
“Di Filipina, kami ngembuan pupu bansa tauka bansa ti bebida.
“Ungkup raban indu, kelingai signifikan enggau pemajik sereta pemerani.
“Tang, bagi orang lelaki, sida ngaga kelingai laban nya upah pengudah munuh munsuh.
“Nyadi, pia mega baka bansa Iban ti deka ngaga kelingai ditu, sida ngaga kelingai dulu sebedau sida beperang laban kelingai sida iya nya pengaruh dikena nyaga sida,” ku iya.
Seni, budaya enggau pesaka asal entara elemen besai ti dikemeranka dalam pengawa ngatur Rainforest World Music Festival (RWMF) 2024.
Nengah festival nya, pengawa bekunsika budaya ulih dipejalaika enggau mujur, seraya ulih nyapai objektif ngatur achara antarabansa nya di Sarawak.-TVS
