MIRI, 30 June: Premier Sarawak Datuk Patinggi Abang Johari Tun Openg madahka inisiatif Sarawak dalam ngemansangka kuasa ulih dikemaru enggau kuasa gadung terus nerima perati ari mayuh bengkah raban nyengkaum sekeda nengeri di Malaysia enggau menua serantau.
Ku iya, nengeri tu andal deka nyadi ‘bateri’ enggau pemekal kuasa ba rantau Asia ti ngasilka mayuh macham puncha nyengkaum hidrogen , solar enggau hidroelekterik.
”Sebedau tu aku bisi ngabas ke Batang Ai meda kediri pemujur kuasa solar.
“Baka ke ditemu kita Batang Ai pemesai 8, 000 hektar enggau kitai udah bejalaika ekperimen deka mungkur tiga peratus atas ai enggau solar melepung ti diatu ngasilka 50 megawatt (kuasa karan).
“Aku udah ngira, nyema kitai nguna ai nya penyampau 60 peratus enggau solar sereta hidro ti nyadi bateri hibrib lalu laluh nya diguna ungkup pengawa betanam enggau entali ai, sitak nya ulih ngasilka 200,000 megawatt.
“Penyampau tu bedau nyengkaum nyema kitai deka ngaga di Murum, Baleh enggau Bakun,” ku iya.
Abang Johari mansutka jaku nya maya Pengerami Malam Gala Penumbuh Curtin Universiti Ke -25 Taun diatur ditu, malam tadi.
Ku terang iya, juluk nya deka ngujungka Sarawak nyadi pemekal kuasa ngagai menua sepiak nyengkaum Singapore enggau maksimum satu gigawatt.
Kuasa tu deka nyadi injin ekonomi Sarawak dikena matak pemeranak puku menua luar ke nengeri dalam ngulihka puncha kuasa.
Nengah insiatif tu, iya deka begunaka tebangkar enggau universiti lokal baka Curtin University ngembuan tangkup pengawa ti besai nempa modal mensia profesional enggau bepengelandik tinggi dalam bidang nya.
“Pekara ti deka dipadahka aku ditu kitai ulih nyadi bateri enggau deka ngeksport kuasa ke Singapore iya nya maksimum satu gigawatt.
“Semenanjung Malaysia mega begunaka kuasa lalu ba jaku bukai kitai bisi pengering.
“Lebuh kitai bisi kuasa, tu deka nyadi injin enggau orang deka datai kitai ngulihka kuasa,” ku iya. -TVS