SARATOK, 30 June: Pekit Lumba Rakit Sungai Krian (KRRC) taun dudi diperunding deka dibuka ngagai penyereta ari tim luar Betong.
Kaban Kunsil Nengeri (ADUN) Krian Friday Belik madah, tu bekau ari sambut ari timbal ke chukup manah ngagai pekit ti keterubah iya diatur taun tu.
“Nyangka taun baru tauka taun dudi kitai deka muka penyereta ari luar Betong selampur Sarawak tauka ari luar Sarawak.
“Nama pekara ti deka diangkat ba Krian ai sungai agi beresi sereta chiru sereta ngembuan rampa menua ke mengkang gadung baka kelia.
“Nyadi tu nyangka ulih matak penyereta ari luar jemah,” ku iya.
Iya madah munyi nya maya dirandau ba adan Pekit Lumba Rakit Sungai Krian (KRRC) 2024 di Rumah Panjai Bakit Engkala Saratok, kemari.
KRRC 2024 bisi dipasuk 37 tim ari komuniti besemak kelimpah ejensi perintah enggau peribit di Betong.
Bisi empat kategori pekit ke belumba penyauh 16 kilometer berengkah ari Rumah Panjai Jaga Eddi Nanga Grenjang enggau tembu ba Rumah Panjai Bakit Engkala.
Champion KRRC tu deka nerima perais mata duit RM1, 500, lumur dua (RM900) enggau lumur tiga (RM600).
Perais pengaga ati penyampau RM100 bela bisi disedia ngagai tim ke bulih penuduk lumur empat nyentuk sepuluh.-TVS
