SARATOK, 30 June: Siku temuai ngemataka Pekit Lumba Rakit Krian (KRRC) 2004, Cecelia Gading, 55 taun madah, pekit nya endang program ke chukup manah dikena nyungkak sosio ekonomi rayat di menua pesisir.
Ku iya, nya mega insiatif ke pemadu manah dikena matak penatai temuai lalu nimpai pemanah rampa menua asal di Krian.
“Program tu chukup manah siti iya ulih ngedut kaul pupu bansa ke bisi diau besemak, kedua ulih nyungkak ekonomi laban orang ke datai chukup mayuh bebelika barang.
“Nyadi peranak ditu ulih muka langkau bejual dikena nambahka belanja.
“Ari sukut dagang temuai iya chukup manah laban aku meda ditu mayuh amat mua orang baru datai ari luar, baka sida ke teleba diau baka ba Semenanjung din enti bisi program baka tu ulih pulai, berebak enggau nya tau meri pemaik ngagai industri dagang temuai,” ku iya.
Cecelia mansutka timbal nya pengudah ngemataka Pekit Lumba Rakit Krian 2024 ba Rumah Panjai Bakit Engkala, kemari.
Udah nya, siku agi temuai ke datai ari Pasir Gudang, Johor iya nya Alicia Imok Fong, 26 taun ti keterubah iya meda aktiviti berakit madahka pekit nya manah amat dibantai ngagai raban nembiak awakka sida ulih rinduka aktiviti lumba nya udah tu.
“Orang biak ke mendam ba mengeri enda kala meda orang berakit ba sungai. Udah tu berakit ba menua pesisir di Sarawak.
“Nyadi tu chukup manah meri peneleba ngagai orang biak lalu aku ngasaika tu inisiatif ke ulih mai semua komuniti di menua pesisir begulai.
“Inisiatif ke chukup manah dikena nyungkak sistem ekonomi sesebengkah endur ungkup semua komuniti,” ku iya.-TVS
