TANJUNG MANIS, 30 June: Pemisi perengkaguna ti meruan nyengkaum jalai alun deka mantu ngangkatka potensyel Kampung Stalun nyadi kandang menua pengeluar lada chelum ba kandang menua tengah sarawak.
Kaban Parlimen Tanjong Manis, Yusuf Abdul Wahab madahka, taja menua jauh, Stalun iya nya sebuah genturung pendiau Iban ti chakah ngemeranka pengawa betanam lada chelum ba tanah landai.
“Engka dudi ila lebuh bisi jalai ngaul menua Stalun enggau Tanjung Manis udah tembu, peranak ke udah bisi lada enggau utai tanam baka tu deka bulih penguntung ti tinggi laban kandang menua nya ulih nyual asil sida enggau jampat agi ngagai pemeli,” ku iya.
Iya mansutka jaku nya pengudah bejadika Pengerami Nutup Program Bomba Komuniti, Pintar Suri enggau ‘Fore Point’ ba Rumah Mut Bohom, Stalun.
Jalai alun nyengkaum jematan ti deka digaga nengah Sungai Bapa ke Kedang, Paloh deka meri pengelantang ngagai peranak di Stalun seraya ngeranchakka agi sektor betanam betupi di kandang menua nya.
Ku iya, pemansang projek nya sebagi ari juluk perintah dalam nyendiaka akses jalai darat ti manah ungkup semua perayat di sitak Parlimen Tanjong Manis.
Beduduk ari nya, perengkaguna ti disedia deka meri pengelantang baru ngagai perayat Stalun ti ngelama tu semina bepanggai ngagai jalai sungai.-TVS
