BELAGA, 29 June: Malaysia deka ngalih penuh ngagai pengawa nguna digital berengkah taun baru.
Sapit Menteri Digital, Datuk Wilson Ugak Kumbong madah, beduduk ari nya semua raban patut ngalih ngagai pengawa digitalisasyen seriris enggau ubah jeman.
“Opis Menteri Digital bisi tiga pugu iya nya, Perintah Digital, Ekonomi Digital enggau Komuniti Digital.
“Reti nya ba taun 2025 perintah enggau servis di Malaysia deka nguna digital.
“Aku pechaya tu deka ngerembai ukai semina ngagai pegawai adminstrasyen, pegawai raban bansa tang mega ngagai semua kitai di menua pesisir, di rumah panjai, sida mesti nemu nama utai dikumbai digital,” ku iya.
Ugak ke mega Kaban Parlimen Hulu Rajang madah munyi nya maya bejadika Pesta Adet Saviek Kajang ba Long Liten ditu, kemari.
Lebuh nerang silik, Ugak madah pekara nya patut diberi perati balat laban nya deka ngubah nasip rayat.
“Tu patut diberi perati balat laban perintah nemu enti kitai enda berubah diatu kemaya agi kitai deka ngubah nasip.
“Sistem tu ukai semina di mengeri tang mega di genturung pendiau enggau rumah panjai.
“Kitai patut belajar ngambika kitai ulih ngasaika siti ekonomi ti deka dikerembaika kitai nengah ekonomi digital.
Tandu Ugak Pelin Strategik Pengawa Digital deka dikemaru seriris enggau transformasyen digital.
Ku iya, Opis Menteri Digital begulai enggau tujuh ejensi bekaul benung berunding ngasilka Pelin Bepelasarka Komuniti, iya nya meri peluang ngagai komuniti menua pesisir pintar teknologi enggau digital.
Pelin nya nyengkaum atur ngimbang enggau mai penyebela ngagai industri digital di mengeri enggau menua pesisir seriris enggau juluk perintah deka meda transformasyen digital dipejalaika lengkas ngambika menua enda tinggal sereta ulih besemekih enggau jampat.-TVS
