KUCHING, 29 June: Aum Besai Rainforest Youth Summit (RAYS) 2024 ti diatur nyerumba ‘Rainforest World Music Festival’ (RWMF) 2024 nyadi pelasar dikena negika atur ke adil ngagai rampa menua enggau rama.
Duta Pengelikun Palestin-Ukraine, Zoya El Miari madah, sekeda perang ke nyadi jam ke diatu udah tentu bisi ngeruga rampa menua.
Ku iya, komuniti enda ulih nyebut pasal atur ke adil ngagai rampa menua nyema enda bejaku ngelaban sistem ke ngemeli.
“Nama utai ke benung nyadi ba Gaza tentu iya meri empas ngagai rampa menua, lalu nya baka ni rampa menua enggau pengelikun tauka pengelantang tauka pengawa negika pengelikun ulih bekait.
“Kita enda ulih bejakuka pasal atur ke adil ngagai rampa menua nyema enda bejaku ngelaban sistem ke ngemeli.
“Berebak enggau nya mega, kitai enda ulih bejaku pasal atur ke adil ngagai rama nyema kitai enda bejaku pasal atur ke adil ngagai rampa menua, baka nya mih pekara tu seruran bekait,” ku iya.
Iya madah munyi nya ngagai TVS maya dirandau ba RWMF 2024 di Kampung Budaya Sarawak, kemari.
Aktivis nya mega meri chunto penyadi ba Hiroshima, Jipun lebuh bom atom dibuai menua barat maya perang dunya kedua udah meri empas ngagai rampa menua enggau rama di serata dunya.
Nangkan ke nya, Zoya pechaya ketuai biak ngembuan penau dalam mai ubah ke chukup besai reti.
“Aku pechaya ngagai kuasa nembiak laban lebuh kitai begulai arapka ubah nya ulih mai kitai ngagai dunya, nya mih ti deka mai ubah nya iya nya nengah kuasa nembiak,” ku tandu iya.
RAYS 2024 diatur ari 26 nyentuk 28 June tu tadi ngaul urung 1,000 penyereta ari 10 menua Asia Tenggara.
Pengawa nya ngempuruka raban nembiak, pakar sektor perintah enggau peribit sereta komuniti sivil ari serata dunya baum dikena netapka pengidup dudi hari ke lebih meruan ungkup semua.-TVS
