BELAGA, 29 June: Sarawak endang wilayah ke tebilang sereta kaya enggau bemacham pekara, penyelai sejarah enggau adat ke nyadi lambang identiti ngemegah Tanah Kenyalang enggau mega Malaysia.
Menteri ba Opis Premier Sarawak Dato Sri John Sikie Tayai madah Pesta Adet Saviek Kajang ke benung diatur diatu endang nyadi pantar dikena ngangkatka penyelai nya.
“Sarawak endang wilayah ke tebilang sereta kaya enggau bemacham pekara, penyelai sejarah enggau adat ke nyadi lambang identiti ngemegah Tanah Kenyalang tu.
“Nengah pengawa ngatur pengerami sehari tu, endang program ke chukup besejarah laban achara tu ukai semina mandangka semangat penyerakup tang mega ngayanka penyelai minoriti nyadi chunto ngagai nengeri bukai ba Malaysia.
Nyadi, bemacham pekara tu patut dijaga, ditan enggau dikerembai ukai semina dirami rebak baru enggau ke deka datai tang mega dikena mantu dalam nyungkak penatai pemisi enggau sosioekonomi perayat nengah sektor dagang temuai,”ku iya.
John Sikie ke mega Kaban Kunsil Nengeri (ADUN) Kakus madah munyi nya maya bejadika Pesta Adet Saviek Kajang ba Long Liten ditu, kemari.
Sama baka bansa bukai, ku John Sikie madah bansa Kajang mega bisi pengerami kediri empu.
“Semua sama nemu, Hari Gawai iya nya pengerami udah ngetau ke diintu bansa Iban enggau Bidayuh nyadi kelai terima kasih (ngagai Petara) ketegal jereki padi ke diulih ninting taun.
Pia mega Kajang, sida ngerami pengawa ngetau nengah pengerami ke dikumbai Pesta Saviek tu,”ku iya.
Ku John Sikie, taja enda mayuh komuniti ke agi nanam padi ba sitak Belaga, tang Pesta Saviek patut terus diintu.
“Enti suba, bansa Kajang deka ngenahka mensia mayuh enggau bemacham pemakai, enggau beperindang baka Ngajat Ngelezyeang Bavui,” ku iya.
Taja pia, sepengudah majoriti etnik tu megai pengarap Kristian lepas penatai mubaligh Kristian ba taun 1970-an Pesta Saviek nyau nadai agi diintu.
Taun 2022 Perintah Sarawak bisi mantu dikena ngidupka baru pengerami bansa Kajang seraya ngempuruka baru etnik enggau komuniti Kajang.
Pesta Adet Saviek Kajang diatur pengelama empat hari berengkah 27 nyentuk 30 June tu.
Taun tu gintir Rumah Panjai Long Liten nyadi tuai rumah ngatur Pesta Saviek, nangkan keterubah suba diatur Gerempung Kajang di Long Segegam ba taun 2022.
Ba pengerami nya, John Sikie bisi ngungkupka belanja sepenyampau RM50,000 ngagai Gerempung Kajang, iya nya RM20,000 ungkup JKKK enggau bela RM15,000 ungkup Biro Indu enggau Biro Nembiak ba Rumah Kejaman Long Liten, Belaga.-TVS
