SARATOK, 29 June: Kaban Kunsil Nengeri (ADUN) Krian Friday Belik madah Pekit Lumba Ensikal Bukit Krian Eco Jamboree diatu ulih diaku nyadi pekit betikas antarabansa.
Ku iya , pekit ke diatur beserimbai enggau Krian Fest Nature Challenge (KFNC) 2024 nya mujur matak 207 iku penyereta ari menua tu nyengkaum ari menua luar baka ari Brunei Darussalam enggau Afrika Selatan.
“Pengawa kitai di Krian diatu belaban ngayuhka ensikal ukai pengawa lokal agi tang udah renggat antarabansa.
“Ukai kitai di Malaysia aja tang bisi bala penyereta ari Brunei sereta mega ari Afrika Selatan,” ku iya.
Iya madah munyi nya maya bejadika Krian Fest Nature Challenge (KFNC) 2024 ba pelaman Rumah Panjai Jaga Eddi di Tembawai Emperan, Nanga Grenjang ditu kemari.
Ku iya, pengawa ngelakuka Krian nyadi palan dagang temuai nengah aktiviti lumba deka terus diatur lebih chakah agi udah tu.
Nya alai dikena ngemujurka juluk nya, agih belanja sepenyampay RM5 juta dibaruh Ejensi Pemansang Bagi Menua Betong (BDDA) udah dikemendar dikena ngangkatka agi Wong Klansau ke ngembuan pemanah rampa nyadi palan dagang temuai lumur satu di Krian.
Sebengkah agi pekit ke bela bisi diatur nyerumba KFNC 2024 iya nya Pekit Lumba Rakit Krian ngerikodka bisi 148 iku penyereta.-TVS
