SARATOK, 29 June: Kaul ti manah sereta kerejasama rat entara pengajar enggau apai indai ba Sekula Sekondari (SMK) Saratok nyadi penyungkak besai ba penyulut sekula enggau nembiak.
Kaban Kunsil Nengeri (ADUN) Krian Friday Belik madahka, kaul ti rat nya mengkang ditanka dikena nentuka SMK Saratok terus nyulut dalam kedua bidang pelajar enggau pemansang lumba.
Ku iya, pemujur nembiak baik ke nya dalam bidang akademik tauka lumba ti dijapai sekula nya nyentuk ke diatu iya nya asil ari penyerakup rat entara kedua raban.
“Pemansang sekula kitai di SMK Saratok baka ke sekali tu endang ari pengiruh kita (apai indai) udah nyukung sereta ngayanka diri chukup angkunka pelajar sekula anak,” ku iya.
Iya mansutka jaku nya rambau bejaku ba Pengerami Nutup Aum Besai Ninting Taun PIBG SMK Saratok di Diwan Sri Sebetan, ditu kemari.
Ku iya, kaul ti manah mega ulih nyadika peransang ngagai raban pengajar terus meri servis ke manah ungkup pemaik semua lebih agi pemansang sekula nembiak.-TVS