JULAU, 29 June: Inisiatif ngemanah tikas perengkaguna pemun ditu lebih agi di Meluan benung chakah dipejalai dikena nentuka pemujur sitak tu nyadi nyadi pengeluar ke pemadu besai lada di Sarawak.
Kaban Kunsil Nengeri (ADUN) Meluan Rolland Duat Jubin madahka turu khas pemansang jalai ladang ungkup ngangkatmanah perengkaguna jalai nyadi akses pekebun lada enggau kelapa sawit di sitak Meluan mai pansut asil ari ladang.
‘Minta turu penyampau RM5 juta dikena ngangkatmanah jalai sawit enggau jalai lada tu dikena meri bantu ngagai bala pekebun.
“Kitai meda jalai tama pansut pekebun tu endang jai, tang laban pengeransing sida, tu ukai nyadi penaanggul ngagai sida.
“Tang aku ke nyadi pengari rayat tu deka mantu enggau minta turu ari perintah nengeri dikena ngangkatmanh jalai kebun (ditu),” ku iya.
Iya madah munyi nya pengudah pengawa nyerahka Bantu Baja Sawit Enggau Lada (BBKSL), Program Fasilitasi Betanam Betupi (AFF)) DUN Meluan ba Opis Betanam Betupi Julau, kemari.
Ku terang Rolland, pengudah projek ngangkatmanah jalai nya digaga, pengemeran industri lada di Meluan dipinta bebendar agi nambahka pemansut asil lada dikena nangkup peminta makit seraya nambahka sosioekonomi lokal.
“Enti kitai meda rikod, maya nya rega lada manggai RM20 ke atas iya nya rega lada chelum putih, RM40 sekilo ke mai reti rayat di Meluan ulih 18 iku nyadi jutawan.
“Rega lada udah berengkah niki, engka lebih mayuh agi orang Meluan nyadi jutawan,”ku iya.
Ku iya madah, mayuh pekebun lada mujur ngembuan aset kediri empu nengah pengawa meli sechara tunai sekalika kerita tauka rumah.
Iya pechaya juluk ngasilka mayuh agi jutawan lada ulih nyadi nyata nengah sukung perintah enggau ngemanah fasiliti ke bisi diatu seraya numbuhka Palan Ngumpul, Proses Enggau Mungkus Produk-Produk Betanam Betupi (CPPC) di Julau.-TVS
