KUCHING, 29 June: Bisi 21 indu bajik ari sarawak enggau sabah deka masuk pekit final ‘Miss Stellar World Malaysia Borneo 2024’ ti deka diatur pagila (30 June).
Pengatur Pekit Miss Stellar World Malaysia Borneo 2024, Kimi Tomas madah, pekit tu ulih nyadi pantar ngagai bala indu bajik ngarika Borneo sereta ngelakuka budaya Borneo ngagai serata dunya.
Ku Kimi Tomas pekit nya mega dikearapka ulih meri peransang ngagai bala penyereta terus nyingkang ngagai tikas antarabansa.
“Aku ngarap udah tu mayuh agi indu kitai ari Borneo Sabah Sarawak meranika diri ngelakuka budaya kitai laban Sabah Sarawak tu chukup nyelai, iya enda sama baka nengeri bukai.
“Kitai kebendar mayuh bakat semina sekeda nya takut deka nguji nyadi tu mih pantar dikena kitai nyingkang ngagai tikas ke tinggi agi. Anang takut, anang malu ngelakuka budaya kitai (Borneo).
“Ari ni penatai nuan lalu aku ngarap Borneo deka nempa nama ke lebih tinggi ba renggat antarabansa udah tu,” ku iya.
Iya madah munyi nya pengudah nyuaka setipikit ngagai pemekit Miss Stellar World Malaysia Borneo 2024 ba Grand Riverine Ballroom ditu, kemari.
Ku terang iya, pekit nya ukai semina dikena ngiga pemajik gamal tang mega ngiga sida ke ulih ngangkatka raban indu enggau nyadi chunto ngagai bala indu bukai.
Pemenang pekit serak tu deka ngarika wilayah Borneo ngagai tikas nasional ti deka diatur bulan Ogos tu.
Udah nya nyema dipilih ngarika Malaysia, sida deka dianjung bepekit ba Atlanta, Amerika Syarikat.
Pekit Miss Stellar World Malaysia Borneo 2024 keterubah iya diatur di Malaysia bisi berebutka tiga bengkah gelar iya nya Kategori Miss Ungkup Umur 18 Nyentuk 29 Taun, Kategori Miss Ungkup Umur 30 Nyentuk 44 Taun enggau Miss Elite Ungkup Umur 45 Taun Enggau Ke Atas. -TVS
