LIMBANG, 28 June: Umur ukai pemar ngagai 20 iku orang tuai ari Rumah Bujang, Rantau Kiran Medamit ditu ngangkatka tikas pengidup diri pengawa nguasa 3M iya nya macha, ngira enggau nulis.
Ku sida, Program Pelajar Pengelandik Literasyen Orang Besai Tuai (LEADS) ti diatur Opis Pemansang Komuniti (KEMAS) endang siti pantar ti nemban dikena ngulihka penemu ngagai sida ti bisi pengagit enggau pengeransing deka belajar.
Mayuh sida ti ngambi bagi dalam program nya beumur entara 44 nyentuk 68 taun ngasaika Program LEADS mantu sida nguasa 3M iya nya Macha, Nulis enggau Ngira.
Ba penemu penyereta ti pemadu tuai dalam program nya, Genut Bungai Lulun madah, semangat enggau pengeransing ti tinggi deka belajar baka nembiak rebak baru ngujungka iya ngambi bagi dalam program LEADS.
“Aku beumur 68 taun, aku ulih baka rebak baru, aku enda nemu macha suba, diatu udah nemu mimit, ulih nulis, ngira mimit, terima kasih ngagai KEMAS,”ku iya.
Iya bejaku munyi nya ngagai pemberita rambau Pengerami Graduasyen Adult Skills (LEADS) Kemas, Renggat Parlimen Limbang 2024 di Diwan Kemas ditu, kemari.
Siku agi penyereta Program LEADS, Rendi Talit, 64 taun madah, taja pan udah bestatus ini, iya enda nyangka ulih nguasa pengelandik 3M pengudah ngambi bagi dalam Program LEADS kenyau tiga bulan ke udah.
“Aku meri terima kasih ngagai Opis KEMAS, umur aku udah tuai, 60 lebih taun lalu diatu udah nemu macha enggau ngira, tiga bulan aja aku belajar, aku meri terima kasih ngagai pengajar kami ti udah ngajar kami dalam tiga bulan tu,” ku iya.
Udah nya, ba penemu Edward Brayan Setia, 54 taun madah, KEMAS mayuh mantu komuniti menua pesisir, tebal agi dalam ngulihka penemu senutuk enggau peminta enggau arus pemansang kemaya hari ngambika sida mega enda tinggal.
Iya mega ngarap raban KEMAS deka muka lebih mayuh agi kelas LEADS dudi hari, sereta nyendiaka lebih mayuh agi program ungkup pemansang modal mensia dikena nguasa 3M.
“Aku meri terima kasih ngagai perintah ti udah numbuhka sekula KEMAS tu, aku meri terima kasih ngagai KEMAS, ngambika deka ngemansangka sekula tu ba menua pesisir,” ku iya.-TVS
