SARATOK, 28 June: Isu begunan enggau kuarters pengajar ti udah repuk ba Sekula Sekondari (SMK) Saratok deka teputar enda lama agi.
Kaban Kunsil Nengeri (ADUN) Krian Friday Belik madah, atur nya dipejalaika pengudah sekula nya dirintaika nyadi entara sekula ti deka dikemansangka ba baruh Program Nyeruri Baru Sekula Repuk di Sarawak.
“SMK Saratok tu udah dipasuk ke dalam perambu, siti ari sekula ke dikumbai sida dalam program pemansang baru sekula di Sarawak.
“Diatu ba peringkat Opis Menteri Pelajar Malaysia (KPM), sida ngadu perambu enggau penyampau belanja dikena ngaduka nya,” ku iya.
Iya madah munyi nya rambau pengawa bejadika Pengerami Nutup Aum Besai Ninting Taun PIBG SMK Saratok, ditu pagi tadi.
Nangkan ke nya, Prinsipal SMK Saratok, Beritin Empawi madah, iya endang berasai lantang ati enggau beterima kasih ngagai ADUN Krian sereta Perintah Sarawak laban udah ngerintaika SMK Saratok ba baruh Program Nyeruri Baru Sekula Repuk.
Ku iya, atur nya siti pekara ti enda meri pengelantang laban sekula nya betapi enggau isu begunan repuk kenyau ari suba.
“Kami meri terima kasih ngagai YB kitai (ADUN Krian) Tuan Friday anak Belik, laban udah bebendar nentuka sekula kitai SMK Saratok ti repuk dipasukka dalam siti program ngangkatmanah sekula menua pesisir ari sukut infrastruktur sereta ari sukut nganti enggau mega ngangkatmanah tikas perengkaguna ke bisi di SMK Saratok,”ku iya.
Ba pengerami ke sama, bisi 15 iku nembiak SMK Saratok ti nyulut dalam SPM 2023 udah nerima insentif pelajar ari ADUN Krian.
SMK Saratok ditumbuh kenyau 62 taun ke udah, diatu ngembuan 815 iku nembiak sekula ari Pom Satu nyentuk Pom Lima.-TVS
