KUCHING, 28 June: Wilayah Sarawak enggau Brunei Darussalam dalam langkar deka negapka agi kerejasama entara kedua-dua menua ti ngaul sekeda sektor, iya nya telekomunikasyen, pengawa betanam betupi, dagang temuai enggau kuasa karan.
Pekara nya bisi diperundingka dalam pengawa betemu entara Sapit Premier Sarawak Datuk Amar Awang Tengah Ali Hasan enggau Menteri Pekara Luar Nengeri Dua Brunei Darussalam, Dato Seri Setia Erywan Pehin Datu Pekerma Jaya Mohd Yusof, sehari tu tadi.
Ba pengawa betemu ke diatur ba Wisma Sumber Alam nya, kededua raban mega bisi berundingka pasal sektor dagang enggau industri, nyengkaum perambu Opis Dagang Enggau Dagang Temuai Sarawak Brunei (STATOB) ti deka dibuka ba Mengeri Seri Begawan enda lama agi.
Kelimpah ari nya, isu bekaul rentayan Jalai Besai Pesisir Utara mega bisi diperundingka beserimbai enggau pengawa betemu nya.
Sama datai, Konsul Agung Brunei ke Sarawak Sheikh Abdul Mahdani Sheikh Abdul Gani, Sekretari Perintah Sarawak Datuk Amar Mohamad Abu Bakar Marzuki, Sekretari Mendam Opis Menteri Pengeraja Asal enggau Pemansang Mengeri Datu Abdullah Julaihi sereta Direktor Unit Perambu Ekonomi Datu Lester Matthew.-TVS
