MIRI, 28 June: Pekit Borneo Star Drift Series enggau National Drift Series Borneo Renggat Kedua deka diatur ba Permyjaya Race Track pengelama tiga hari, berengkah 19 nyentuk 21 Julai tu.
Datuk Bandaraya Miri, Adam Yii Siew Sang madahka, achara nya ukai semina deka matak penatai peminat lumba motor ke Miri, tang mega deka mandangka miri ulih nyadi tuai rumah ungkup achara ti beprofil tinggi.
“Achara baka Borneo Star Drift Series enggau National Drift Series Borneo ukai semina mandangka bakat enggau pengelandik ti nyelai ba raban drifters lokal.
“Tang mega matak penatai peminat achara tu ari jauh enggau besai.
“Tu mih bukti semangat enggau pengeransing semua orang ti ngaul dalam lumba motor.
“Nya alai, Datuk Bandar Miri, aku temegah ati meda mengeri kitai ulih nyadi tuai rumah ngagai achara beprofil tinggi.
“Ukai semina ulih merindang, tang mega meri inspirasyen ngagai raban nembiak kitai sereta meransang gaya idup ti bepengerai enggau aktif,” ku iya.
Iya bejaku munyi nya rambau Aum Media Pekit Drift Borneo ba Palan Parti Sa’ati Rayat Sarawak (SUPP) Pujut, Hari Empat.
Tandu iya, ari pemisi Miri ti ngembuan trek ke engkeman dikena ngatur achara lumba motor, pengelebih nya ulih mantu nyapai aspirasyen miri nyadi palan achara lumba ti deka datai.
Bisi 30 penyereta nyengkaum ari Sabah enggau Indonesia bisi ngambi ba pekit nya.
Champion pekit tu deka nerima perais mata duit penyampau RM10, 000, lumur dua (RM5, 000) sereta lumur tiga (RM1, 000).-TVS