SARATOk, 28 June: Penumbuh Palan Tesau Penerang Nasional (NADI) ba Opis Pelilih Mit Nanga Budu siti ari inisiatif ke beguna dikena nyungkak tikas sosioekonomi perayat menua pesisir di Krian enggau Saratok.
Kaban Kunsil Nengeri (ADUN) Krian Friday Belik madah, penumbuh NADI di Nanga Budu iya nya keterubah di Krian nyadi penyungkak dalam transformasyen sereta ngerapitka seraka digital komuniti menua pesisir di sitak nya.
“Tuju perintah ngambi meri peluang ngagai komuniti menua pesisir ngambi ngasaika perengkaguna ke baka perayat di mengeri.
“Pemisi pelasar tu ila, perayat menua pesisir enda tinggal ari sukut inisiatif perintah lebih agi ngaul transformasyen ekonomi digital ke dipejalaika perintah ungkup pemaik rayat di menua pesisir,”ku iya.
Iya bejaku munyi nya rambau pengudah baum sereta ngabas taba endur numbuhka palan NADI di Nanga Budu Saratok, kemari.
Ku terang iya, penumbuh palan NADI nya deka berengkah pengudah taba nya diserah ngagai raban Telekom Malaysia ti nyadi ejensi pengereja pengawa lalu pengawa nya dipejalai abis laun bulan Oktober tu ila.
Pengawa milih Pelilih Mit Nanga Budu nyadi endur keterubah penumbuh NADI endang senutuk enggau sekeda projek pemansang ke udah diperambu ba sitak nya nengah Ejensi Pemansang Bagi Menua Betong (BDDA).
Palan NADI nya deka beoperasyen ba sebuah begunan lama Perintah Sarawak ba baruh atur adminisitrasyen Opis Pelilih Mit Nanga Budu.
Bepelasarka rikod, Pelilih Mit Nanga Budu naka ke diatu nyaga urung 82 buah rumah panjai enggau penyampau pengani ba menua nya urung 8,239 iku.-TVS
